Atuarfinni taqussat meeqqanit neriumaneqanngillat
Atuarfinni nerisassanik maangaannartitsisoqartartorujussuuvoq. Maannakkut taqussanik nerisaqartitsisarnermik aaqqiineq allanngortinneqarpoq
Angajoqqaat qitornatik atuarfimmi ullumikkut sutorsimanerannik aperigaangamikkit akissutissaat nalunngereertarpaat.
- Mamarinngisakka!
Atuartorpassuit ullormut ullo´qeqqasiutissaminnik illigisaqartannginnerat pissutaalluni maannakkut kommunimit akuliuttoqarpoq. Siunissami atuarfimi taqussat pillugit aaqqiineq allanngortinneqassaaq sipaarniarfigineqarlunilu.
- Piffissap ilaani nerisassat qanoq annertutigisut maangaannartinneqartarnersut misissorsimavarput: Angusallu tupannartorujussuupput, Kommuneqarfik Sermersuumi Piorsaanermut ingerlatsivimmi pisortaq Margrethe Thuesen oqarpoq.
Ullormut nerisassat 40 procentii tikillugit iginneqartarput tamakkulu aningaasanngorlugit ukiumut millionilikuutaat iginneqartarput.
Kisianni Margrethe Thuesen isumaqarpoq nerisassat pitsaassusiannut tamanna takussutissaanngitsoq imaluunniit pisiniartarfimmik namminersortumik isornartorsiuinerunngitsoq:
- Uangami nammineerlunga angajoqqaajuvunga. Uagut angajoqqaajusut aamma maani Nuummi meeqqat meeqqanit allaniittunit immaqa nukatsitaanerulaaginnartut nassuerutigiinnartariaqarunarparput. Kommunerujussuarmi sumiiffinni allani taama annertutigisumik nerisassanik eqqaasoqarneq ajorpoq. Tamakkunanimi meeqqat atuarfinni taqussanik nerisarput, Margrethe Thuesen oqarpoq.
Atuarfinni nerisaqartitsisarnermik aaqqiineq kommunimi Piorsaanermut ataatsimiititami oqaluuserineqaqqammerpoq. Tassani aaqqiineq apriilip ulluisa aallaqqaataaniit annikillisinneqassasoq aalajangerneqarpoq, taamaalillutik Nuup illoqarfiani atuarfinni atuartut 1. klassiniit 7. klassini atuartut kisimik ullo´qeqqasiutissanik akeqanngitsunik neqeroorfigineqartalissapput.
Nuummi susoqarnersoq Nuuk Ugeavisimi oqaluttuanik amerlanernik atuarsinnaavutit. Aviisi akeqanngitsumik uani pisiariguk: