Partiini siulittaasut sulerissappammita

Sermitsiaq.AG-mit paasiniarparput partiini siulittaasut qinersisoqarnerani ullup ingerlanerani sulerissanersut

Nunatsinni partiini siulittaasut. Assi.: Leiff Josefsen

Immaqa eqqarsaatigisimassavat partiini siulittaasut qinersisoqarnerani sulerissanersut.

Sermitsiaq.AG-mit paasiniarparput partiini siulittaasut ullup ingerlanerani sulerissanersut.

Partiit siulittaasui tamarmik Nuummiipput.

Jens B. Frederiksen, Demokraatit siulittaasuat:

- Ullup ingerlanerani Katuameeqattaassaanga. Tassani parteeqatikka ilagissavakka. Unnugu Godthaab Bryghusimi nereqatigiissaagut. Eqqissisimaarniarpunga kiisalu inuit qinersiartortut oqaloqatigisassallugit. Qinersinerup inernissaa soorunami pissanganartippara, tassami qineqqusaarnermut nukigut tamaasa atornikuugatsigit. Qinersinerup inernera utaqqiinnarsinnaanngorparput.

Anthon Frederiksen, Kattusseqatigiit Partiiat siulittaasuat:

- Qineqqusaarutit suli nivinganersut misissussavakka, maanimi sila ajorteriataarami. Pissangarrappugut qinersinerup inernissaanut. Qinersinermut inernerit 'Pilutaq'-mi parteeqatigiilluta malinnaaffigissavagut.

Gerhardt Petersen, Atassut siulittaasuat:

- Ullumi Katuamiinniarpunga. Qinersinerup inernissaa pissanganaqaaq, malugisinnaavaralu ulloq nuannersuujumaartoq, naak maani sila unerisimavallaanngikkaluartoq. Unnugu parteeqatigiilluta Radiup qaqqaaniissaagut.

Kuupik Kleist, Inuit Ataqatigiit siulittaasuat:

- Eqqissisimaarniarpunga kiisalu Katuami inuit naapikkiartortarniarpakka. Soorunami partiitsinni qinersinerup inernissaa pissangassutigaarput. Ullut qinersiffiusut takisuupilussuusarput, aamma unnugu partiit siulittaasui unnuap qeqqanut oqalliseqatigiartorniarpakka. Unnup ingerlanerani eqqissisimaarniarpunga qinersinerup inerneri malinnaaffigiutai. Unnugu partii Inussivimmi naapisimaassapput tassani nipilersortoqassalluni. Ulloq qinersiffik nuannertuaannarpoq assigiinngitsunik misigisaqarfiusarmat.

Nikku Olsen, Partii Inuits formand:

- Nuannaarluta ulloq atussavarput. Katuap silataaneerujuussaagut ullumi. Unnugu Katersortarfimmiinnissatsinnut piareersaateqassaagut. Partiimi amerlasuujunnginnatta nutaajullutalu nammineerluta piareersassaagut unnugumut. Katersortarfimmi nereqatigiissaagut aammalu nipilersortoqassalluni. Nipilersortartorpassuarnik nalunngisaqaratta aggiagumaarput nipilersoriarlutik. Imaassinnaasoq uanga aamma unnuup ingerlanerani appikkumaartunga. Unnuk nuannersupiluusussaavoq. Qinersinerup inernissaanut pissangavunga kisianni pissangapilunngilanga.

Aleqa Hammond, Siumut siulittaasuat:

- Siumut Godthåbhalimi unnussiuaassaaq nalunaaqutaq 20.00-imiit. Sussat nipilersorumaarput.

Powered by Labrador CMS