Nunafonden Kulusumut ikiuunniarpoq
Meeqqat inuusuttullu Kulusumi nipilersorlutillu sungiusartaleqqinnissaat ilimanarluinnarpoq. Nunafonden ikiuunniarluni maanna nalunaarpoq
Kulusumi nipilerpalaaq tusarsaaleqqikkumaarpoq. Apeqqutaaginnarpoq qaqugu meeqqat inuusuttullu nipilersuutissaat tikikkumaarnersut.
Kulusumi illup nipilersortarfiup tallimanngormat nungulluni ikuallannerata kingorna ikiuukkusuttoqarpoq. Kommuneqarfik Sermersooq sutigut ikiuussinnaanerluni misissuivoq. Maanna aamma Nuna Fonden ikiuunniarluni nalunaarpoq.
Aningaasat qanoq amerlatigissappat
- Siulersuisut tamarmiusut isumaqatigiissutigaat pisinnaaneq tamaat atorlugu Kulusummi meeqqat inuusuttullu nipilersornikkut nuannaaruteqarsinnaanerat piffissaq qaninnerpaakkut aallunneqaqqinneqalersinniarlugu suliniaqataajumalluni, Nunafonden sinnerlugu aningaasaateqarfimmi aqutsisoq Steffen Petrussen nalunaarpoq.
Taamaattoq Kulusumi meeqqat inuusuttullu nipilersorlutillu sungiusarsinnaaleqqinnissaat anguniarlugu aningaasat qanoq amerlatigisut tunniunneqarniarnersut Nuna Fondenimit nalunaarutigineqanngilaq.
- Siulersuisut aalajangiiffiginngilaat qanoq annertutigisumik peqataasinnaanerluni, apeqqutaalluinnarmat suut atorfissaqartinneqarnersut. Aningaasaateqarfiup siulersuisuisa pingaartippaat nalunaarutigissallugu taamak pisoqarneranut atatillugu ikiuukkumassuseqarluarami, Steffen Petrussen nalunaarpoq.
Kommuneqarfik Sermersuup ikiuunnissani maanna misissorpaa. Borgmester Asii Chemnitz Narup aamma Kulusumi nunaqarfimmi aqutsisut marlunngorneq martsip aqqaneq aappaat ataatsimeeqatigiinniarput.
AAMMA ATUARUK: SUNGIUSARTARFIUP IKUALLANNERA NIPANGERSITSISSANNGILAQ
IKUALLANNERMIT ASSIT UANI TAKUKKIT