Sermitsiami pingaarnertut allaaserisaq: Upperisat neriuutillu naammanngillat

Inatsisartunut qinersisoqarnissaanut pissanganartumut qilanaartuutitut Sermitsiami pingaarnertut allaaserisaq matumani ilanngupparput

Assi.: Leiff Josefsen

(Poul Krarup aviisimi Sermitsiaq-mi aaqqissuisuuneruvoq)

Marlunngorpat qinersinissaq ilungersunarpoq.

Illuatungaani aningaasaqarnerup akisussaassulimmik ingerlanneqarnissaa qulakkeerneqartariaqarpoq.

Illuatungaani innuttaasunit amerlasoorparujussuit ullumikkut sunniuteqanngitsutut misigisimasut ineriartornermi peqataatinneqarnissaat qulakkeerneqartariaqarpoq.

Ullumikkut naalakkersuisuusunut illuatungiliuttut tunngavigaat amerlavallaat suliffeqannginnerat, amerlavallaat ilinniakkaminnik naammassinninneq ajornerat, Piareersarfimmit tapersersorneqartariaqartorpassuit ilinniakkamillu ingerlatsisariaqartut amerlasuut inissaqartinneqannginnerat, inuusuttut amerlavallaartut suliffinnik sungiusarfissanik pissarsisinnaannginnerat ilaallu ilanngullugit.

Naammagittaalliornerup qiteraa amerlavallaartunit siunissaqannginneq misigisimaneqarmat.

Aaqqissuussaaneq qallikkut pinnissuseqarpoq kisianni pulatilaaraanni pinnissuseq tamarmi kataatissaaq.

Inuit ikiorneqarnissamik tapersersorneqarnissamillu pisariaqartitaminnik pisinnaanngillat, inuit ajornartorsiutaannit ikiorneqarnissaannut naammattumik aningaasaliisoqarsimanngimmat. Inuit ilaat ikiorneqarneq ajorput naak pisinnaatitaaffigigaluarlugu.

Inuusuttut ilinniagassatut kissaatiminnik pissarsinngitsoortarput.

Innuttaasut akinik qaffakkiartuinnavissunik atugassaqartinneqarput isertitat malinnaaffigisinnaanngisaannik, suliffissarsiortunngorsimanngikkaangamik.

Pisortat aaqqissuussaanni inuit ikiortariaqartut ikiorserneqarnissaannut aningaasat naammanngillat.

Pissutsit paatsuugassaanngitsut ersersippaat, aningaasaqarnerup aallarsarnissaa qanoq pingaaruteqartiginersoq aamma nunatta aningaasaqarnerata aalisarnermit kinguariartortumit ataatsimoorussanillu tapiissutinit ikiliartortunit tunngaveqassalluni naammanngilluinnarpoq. Tamatuma nalaani pisortat karsiisa tatineqaraluttuinnarnerat suli malunnarsiartorpoq.

Taamaattumik pingaaruteqartorujussuuvoq tunisassiornermik inuussutissarsiornerup aallartisarnissaa, taanna 2006 aallarnerfigalugu neriulluaatigaarput.

Aningaasaqarneq aallartinneqartariaqarpoq
Upperneq neriunnerlu naammanngillat.

Taamaattumik pingaaruteqarluinnarpoq marlunngorpat Inatsisartut qinigassagut tassaassasut, nutaamik ineriartortoqarnissaanut sinaakkusiisinnaasut, nunanit allanit aningaasaleerusuttut uagutsinnik tatiginnissinnaaqqullugit, nunallu sananeqaataa unammilligassartaqaraluaqisoq nunatsinni aningaasaliinissaminnut kajumissuseqarniassammata.

Soorunami aningaasatigut sinaakkutissat inissisimasariaqarput inuiaqatigiinnit pissarsissutaaniassammata.

Soorunami avatangiisit innarlerneqannginnissaat mianerisariaqarpoq.

Ingerlatsiviit nalunngilaat inuiaqatigiit tamakkuninnga piumasaqaateqartut.

Tamakkua tamarmik imminnut ataqatigiissinnissaanni suliassaq imaannaanngilaq.

Pisariaqarporli uagut politikerinik taamannak ingerlatsisinnaasunik qinersinissarput.

Eqqaamasariaqarporli aatsitassat imaluunniit aatsitassarsiornermik ingerlatsisut pillugit ineriartortitsinissaq taanna kissaatiginnginnatsigu.
Anguniarneqarpoq kukkunnut tamanut inuiaqatigiinnik pitsaanerusunik aamma Kalaallit Nunaata siunissaanik pitsaanerusumik pilersitsinissaq.

Qinersilluarisi!

Sermitsiaq sapaatip-akunneranut saqqummersartoq qinersinissaq pillugu sammisaqangaatsiarpoq. Aviisi uani pisiariuk.

Powered by Labrador CMS