Assiisivik: Clementip oqalliseriaaseq qaffaallatsikkaa
Ataasinngornermi unnukkut KNR-ip DR2-mi aallakaatinneqartartoq 'Debatten' immikkut ittumik aallakaatissavaa, tassani Clement Kjersgaardip kalaallit politikerit killisiorpai
Alutornartumik isiginnaagassaqarpoq ataasinngornermi unnukkut DR2-mit aallakaatinneqartartoq 'Debatten' KNR-ikkut aallakaatinneqassammat, aallakaatitsivimmiittartumit nuannarineqartumit pikkorilluinnartumillu Clement Kjersgaardimit aqunneqarluni.
Arfininngornermi ullup-qeqqata siorna Nuummi GU'p timersortarfeeraani aallakaatitassaq immiunneqarpoq. Suut tamaasa eqqartunngikkaluarlugit oqaatigisariaqarparput, Naalakkersuisut siulittaasorigallagaat Kuupik Kleist aamma Siumut siulittaasua Aleqa Hammond qaqutigorsuaq aatsaat taamaatsillugit takusaratsigit, oqallorilluinnarput qungujulanerullutik eqqissisimarpasinnerullutillu, partiit siulittaasui allat peqatigalugit - Nikku Olsen Partii Inuit-neersoq minillugu - sukkasoorsuarmik oqaluttartoq tusagassiortunillu allanit nuannaartorineqartoq Clement Kjersgaard pulaaramikku.
’Debatten’ KNR-ikkut ataasinngornermi unnukkut nal. 19.30 aamma 20.30 aallakaatinneqassaaq.
Teknik pissutigalugu aallakaatitaq qallunaatooq KNR1-ikkut kalaallisullu nutsigaq KNR2-kkut aallakaatinneqassapput.
Marlunngornermi unnukkut DR2 allamik aallakaatitsissapput tassani MF Martin Lidegaard, Radikale aamma MF Martin Henriksen, Dansk Folkeparti, oqallinnermi peqataatinneqassallutik.