Sanaartukkat 67 procentii Nuup avataani ingerlanneqarput
Jens B. Frederiksenip sanaartornermi agguaariaaseq pillugu oqaaseqaataa tupaallannartoq ilumoortortaqarunarpoq
- Sanaartukkat tamarmik Nuummi ingerlanneqarput!
Ukiuni kingullerni sisamani Naalakkersuisunik isornarsiut taamaattoq akuttunngitsumik tusarliunneqartarpoq. Naammagittaalliortut misigisarpaat sinerissamiittoq illoqarfitsik imaluunniit nunaqarfitsik sanioqqutiinnarneqartartoq. Taamaattumik tupaallaatigineqaqaaq Jens B. Frederiksenip, Demokraatit sinnerlugit qinigassanngortittup qinersivimmilu qaangiutilersumi Ineqarnermut, Attaveqarnermut Angallannermullu naalakkersuisuusup sapaatip-akunnerisa marluk matuma siorna sanaartornermi pissutsit oqaaseqarfigimmagit.
- Sanaartukkat 67 procentii Nuup avataani ingerlanneqarput, Ilulissani qinersisartunik ataatsimiisitsinermi TV-ikkut toqqaannartumik aallakaatinneqartumi taamak nalunaaruteqarpoq.
Oqaaseqaata ilumoorluinnangajappoq. Naak oqaaseqaammini immaqa ikinaarilaaraluartoq. Tamannami takuneqarsinnaavoq Nuummi sinerissallu sinnerani sanaartornerup agguataarneranik Aningaasaqarnermut naalakkersuisoqarfiup Maliina Abelsenimut suliaani.
Takussutissiap ersersippaa 2013-imut aningaasanik inatsimmi sanaartornermut atugassiissutaasunit 3643,8 mio. koruuniusunit 1196,6 mio. koruunit Nuummi sanaartukkanut atugassiissutigineqartut. Nuummi atorneqartussat procentinngorlugu 33-uuput nunatta sinnerani 67 procentiusut. Nalunaarusiami Nukissiorfiit aamma Mittarfeqarfiit suliaat ilanngunneqanngillat. Kisitsinermi Ilulissani ermup nukissiorfianik sanaartorneq ilanngunneqarsimanngilaq.
Sineriammut aningaasaliissutit immikkut ilaneqarnerat
Nalunaarsukkalli kukkunermik ilaqarput. Kollegianut konto pingaarnerup ersersippaa 655,8 mio. koruunit. Aningaasanik taakkunannga 70,2 mio. koruunit sinerissami ilinniartut inaannut 66-inut atorneqartussaapput. Taakkuali 70,2 mio. koruunit Nuummi atorneqaannarput aningaasat kukkusumik inissinneqarsimanerat pissutigalugu. Taamaattoqarsimanngikkaluarpat sanaartukkat 35 procentii Nuummi ingerlanneqartutut taaneqarsimassagaluarput sinerissap sinnerani 65 procent. Paarlattuanik aningaasanut inatsimmik pingajussaaneerinninnermi kisitsisit nikitinneqaqqipput. Taamani sanaartornermut aningaasanik amerlanernik sineriammut nuussisoqaqqimmat.
Assersuutigalugu Ilulissani atuarfiliornissamut aningaasat illuartinneqareersut saniatigut 75 mio. koruuninik amerlanernik pissarsipput aamma Narsami Alluitsup Paanilu atuarfiit iluarsaanneqarnissaannut 72,6 mio. koruuninik amerlanernik tunineqarlutik.
Sanaartornerit taakkua aallaavigalugit sanaartornermik aningaasat agguataannerini Nuup avataani atorneqartut 67 procentinngungajavipput.
Ukiuni 20-t missaanni Nuummi inissialiorneq saqqummiunneqartuni ilanngullugu kisinneqarsimavoq. Tassaallutik Qinngutsinni Pingorsuarmi illorsuarnik qulinik 300-nik inissiatalinnik nunap karsianit akilerneqartunik sanaartorneq.
Sanaartorneq ukiakkut 2010 aallartinneqarpoq illorsuillu sanaartuukkat kingullersaat ukiakkut 2013 naammassineqarsimassalluni. Aningaasaliissutinit 320 mio. koruuniusunit suli 202,5 mio. koruunit akiliutigineqanngillat. Tamanna aallaaveqarpoq inissiat taakkua 300-t sanaartornermik iluarsartuussinermillu aningaasaateqarfimmit ingerlaavartumik akilersorneqarmata.
Sermitsiaq nummer 9 aamma 10 atuakkit. Saqqummersoq kingulleq uani pisiariuk: