Video: Thaiboksningimi kalaaleq Europami pissartanngorpoq
23-nik ukiulik Frank Madsen Thaiboksningimi Euopami pissartanngorpoq. Nunat allamiut kalaaleq tilluutillammak suli takorusuppaat
Thaiboksningimi Europami pissartanngorneq pivoq Aarhusimi Ridehus-imi tassani 70 kilo ataallugu oqimaassusillit Europami pissartanngorniunneranni Frank Madsen Bulgariamiumut Valery Valkovimut unammivoq.
Aarhusimi unammisitsineq taaneqarpoq Valhalla 2013, tassani arlalinnik unammisoqarmat.
Frank Madsen unammisussanngormat iseriartornermi kalaallit erfalasuat Frank Madsenip saavani tigumiarneqarpoq tassalu immikkoortuni tallimani ajugaasussarsiniartoqartussanngorluni.
- Niui isimmisarlugit eqqoqataarpakka taamaasilluni saassusserianngitsoortillugu, Frank Madsen Sermitsiaq.AG-mut oqarpoq.
Dubaimi takujumavaat
Taamatut periuseqarnera iluatsippoq. Immikkoortut sisamaanni dommerip unammineq unitsitsippaa Valery Valkov saassusseriarniarani imminut illersuinnalermat.
Frank Madsen ukiuni arfineq pingasunik Thaiboksningimik unammisartuunermini nunat tamalaat unammeranni aatsaat pissartanngorpoq. Karatemik soqutigisaqarnera aallartippoq Nuummi meeraalluni Nuuk Shotokan Karate Do-mi ilaasortaanerani.
Arfineq pingasunik ukioqarluni Aarhusimut nuuppoq maannalu The Colosseumimi unammisartuulluni ukiut arfineq pingasut kingulliit Thaiboksning ingerlassimallugu. Maanna Europami pissartanngornera nunani allani malugineqalereersimavoq.
- Maajip qaammataani Dubaimut unammiartornissamik neqeroorfigineqaraluarpunga. Kisianni ajugaanniunnermi kanaakka ippinnarsinikuummata qaqugu ippinnarunnaarumaarnersut apeqqutaavoq, Frank Madsen oqarpoq.
FRANK MADSENIP PISSARTANNGORNIARLUNI UNAMMINERA UANI TAKUUK