Qinersineq ima malinnaaffigissavarput
Sermitsiaq.AG-mit kaammattuutigineqarpoq nittartakkamut assimik Inatsisartunut qinersinermut tunngasumik nassissisinnaagavit
Inatsisartunut qinersineq pissanganartorujussuusussaavoq. Qinersineq ullaakkumiit qinersinerup inernerata tungaanut nutaarsiassanik nittartakkamut ikkussisassaagut.
Qinersinerup inernera unnuakkut ataatsip missaanni nalunaarutigineqarumaartoq ilimanarpoq. Unnukkut arfineq-marlunniit qinersineq pillugu nutaarsiassiineq aallartinneqassaaq, tassani toqqaannartumik apersuisassalluta, kiisalu nutaarsiassat kingulliit qinersinermut tunngasut ikkunneqartassallutik. Pulaartoqartassaagut, pulaartugullu illit aamma apeqquteqarfigisinnaavatit.
Inatsisartunut qinersineq nuannersuutinniarlugu kaammattuuteqarpugut qinersinermut tunngasumik assimik nassissisinnaagavit. Kalaallit Nunaanniikkuit nunaniluunniit allaniikkuit assimik nassissisinnaavutit.
Assileeriarlutit assilisat pillugu naatsumik allariarlugu maanga nassissisinnaavutit. Unnup ingerlanerani assit nassinneqarsimasut takutitassanngorlugit nittartakkami ikkunneqassapput, kiisalu toqqaannartumik nittartakkami qinersineq pillugu allattarnitsinni assit aamma takuneqarsinnaassapput. Qinersinermut tunngasoq toqqaannartumik allattarnerit nalunaaqutaq 19.00-imit aallartinneqassaaq.
Asseq assillu oqaasertalernera uunga nassiuguk netredaktion@sermitsiaq.ag