Qaleralinniarneq: Aalisartut isiginnaartuinnanngorsimapput
TV-iikkut apeqqarissaarneq, politikkikkut akisussaasup Ane Hansenip, IA, KNAPK-mi pisortap Petrus Biilmannip aamma Siumumeersup Tom Ostermannip qaleralinnianut atugassarititaasut pitsaanngitsut pillugit isummersorfigisaat, isiginnaaruk
Qaleralinnik pisassiissuteqariaaseq nutaaq juulip aallaqqaataani 2012-imi atuutilersinneqarmalli aalisariutini inuttat 20 procentimik ikileriarsimapput, pisassiissutinillu pisisoqartarnerani tunisinermi akigitinneqartut qaangerlugit akiliisoqartarluni.
Tunisinermi akigitinneqartut pitsaanersaat kg-mut 21 koruunit missaanniippoq, pisassiissutinilli pisinermi ullumikkut kg-mut 30 koruunit akigitinneqartarlutik. Tamanna aalisartut akornanni kinguaariit nikinnissaannik mattussiinnaanngilaq, aammali inuttarpassuit siunissamut nalorninartorsiornerannik kinguneqarluni. Aalisariummik piginnittoq pisassiissutinik pigisaminik allamut tunisaqarpat inuttat eqqornerlugaassapput.
Sinerissap qanittuani qaleralinniarnermi aqutsinissamik pilersaarusiaq nutaaq Inuit Ataqatigiinnit, Demokraatinit aamma Kattusseqatigiit Partiiannit tunuliaqutaaffigineqartoq inuttat ilaasa akuersissutaatiminnik nutarteriffigineqarsimannginnerannik kinguneqarpoq.
Umiatsiaararsortut ikileriapiloorsimapput, umiatsiaararsortut 96-it akuersissutinik tunineqarsimanngimmata. Tamanna piffissap qaammatit arfinilinniit arfineq-pingasunut ingerlanerani 10 procentit missaannik appariarnermik kinguneqarpoq.
Videomi matuma qulaaniittumi annerusumik isiginnaarit, tassani Aalisarnermut, Piniarnermut Nunalerinermullu naalakkersuisuugallartoq Ane Hansen, Inuit Ataqatigiit, KNAPK-mi pisortaq Petrus Biilmann aamma Siumut tunuliaqutaralugu Inatsisartunut qinigassanngortittoq Tom Ostermann peqataapput.