Kuupik aamma Ove Karl: Ulloq siullermiit isertitat
- Taamaannerani eqqaamasariaqarpoq pisuussutinik uumaatsunik aningaasarsiorfittut suli inissisimannginnatta. Taamaattumik suliffeqarfiit suliluunniit aallartisartinnagit aningaasatuutitalersornissaannik mianersortariaqarpugut, Naalakkersuit siulittaasorigallagaat Kuupik Kleist oqarpoq.
- Pisuussutinik uumaatsunik suliniutit aallartippata, ulloq siullermiit isaatitsilissaagut. Isertitsissutaasullu tassaapput sulisut sulinerminni akileraarutaat kiisalu suliffeqarfiit iluanaarutiminnik akileraarutaat. Imaaginnanngilarli suliniummik ingerlatsisoq suliffeqartoq pineqartoq, tassami suliniuteqarnermik sullissisut suliffeqarfiit aamma ilannguttariaqarput. Taakku sulisuai aamma sulinerminni akileraarummik akiliissapput, soorlu aamma suliffeqarfiit iluanaaruteqarnerminnit akileraartussaasut.
Naalakkersuisut siulittaasorigallagaat Kuupik Kleist, IA, aamma Ove Karl Berthelsen, IA, Inuussutissarsiornermut aatsitassanullu Naalakkersuisuugallartoq ataatsimoorlutik tusagassiivinnut allapput.
Allaaserisaat qineqqusaarnerup nalaani oqalinnerpassuarni oqaaseqaatinilu aatsitassarsiorfinnut akitsuusersinissanut eqqartorneqartunut royaltymik taaneqartartumut qisuariaataavoq.
Assersuutitsialaavoq Cairnip 2010-mi 2011-milu misileraarllutik qillerinerat. Qillerinerit 100 mio. nilikkaanik tamatsinnut iluaqusiisut. Imaappoq misissuinermiilli isaatitsilereerpugut, tamannalu iluarisimaanngitsoorsinnaanngilarput.
- Pisuussutit uumaatsut pillugit oqallinnermi assigiinngitsunik siunnersuuteqartoqartarpoq suliffeqarfinnik qanoq akileraarusersuissanersugut. Uteqqiaffigineqartut ilagivaat aatsitassat annertussusaat tunngavigalugu akitsuusersuiniarneq, tassa suliffeqarfiit kaaviiaartitaanik akileraarusiineq.
- Pisuussutinik uumaatsunik piaanermik ingerlatsiviit suliniutip tamakkiisumik aningaasatigut ingerlaarnera nalilersortarpaa, tassa aningaasartuutaasussat siunissamilu isertitassat tamakkiisumik qimerloortarpaat. Taamaannerani nunat unammisavut qissimigaartariaqarpavut. Naligiissaarinermilu suliakkiissutigisatsinni erserpoq maanna akileraartarnikkut akitsuusersuisarnikkullu inissisimanerput unammillernermut ajunngitsumik inissisimatitsisoq. Inissisimaneq illersortariaqartoq.
Allali oqallinnermi tassanerpaq pingaaruteqartoq tassaavoq, nunat ikittuaraannaat suliffeqarfiit kaaviiaartitaat tunngavigalugit akitsuusersuimmata.
- Taamatut akitsuusersuisut ilisarnaatigaat ukiorpaalussuarni taamatut misilittagaqarsimagamik, assersuutigalugu Australia. Tamakku tunngavigalugit aatsaat pissusissamisuulissaaq eqqarsaatigilissallugu akitsuusersuinerit eqqunneqarsinnaannissaat pisuussutinik atuisutut inissisimanerput piviusunngoreerpat Kuupik Kleist aamma Ove Karl Berthelsen tusagassiivinnut ataatsimut allapput.
Naatsumik oqaatigalugu: siunissamut ungasissumut attassatsinnik periuuseqartariaqarpugut, siunissamut ungasinnerusumut atuuttussamik periuusissamik nutaamik isumaqatigiissuteqarnissatta tungaanut, Kuupik Kleist aamma Ove Karl Berthelsen, tusagassiivinnut ataatsimut allapput.
Namminersorluni oqartussaanermik inatsit naapertorlugu royalty aamma ingerlatsivinnik allanik akileraarusersuineq, aatsitassarsiorfinnit imaluunniit uuliasiornermik ingerlatsisunit pissarsiarineqartoq Danmarkip aamma Kalaallit Nunaata avitassaraat. (Kalaallit Nunaanni aningaasaateqarfimmut nakkassallutik) aningaasat taakkua 75 mio. koruunit sinnerlugit amerlassuseqarpata, illuatungaani A-nik akileraarutit aamma tuniniaaqqinnermik ingerlatsinermut tunngasunit isertitat kisisiisa Nunap Karsiata iluanaarutigissavai.