Narsami arnatsialaat

Arnat imaannaanngitsut tamarmik immikkut malunnaateqarsimasut, nunarsuaq tamakkerlugu arnat ulluanni tallimanngornermi Narsami nersorniarneqarput. Ualikkut oqaluffimmi arnarpalaartumik qinoqatigiinneq ingerlanneqarpoq, unnukkut illoqarfiup katersortarfiani kaffeqarlunilu kaaginik sassaallertoqarpoq isiginnaartitsisartut aliikkusersuillutik, erinarsoqatigiittoqarluni kiisalu arnat assassukkaminnik saqqummersitsillutillu tuniniaapput.

Taamatuttaaq ukiup arnatsialaa 2013 toqqarneqarpoq. Tallimaannaat!

Niviarsiaq Cecilie Josefsen toqqarneqarpoq inuusukkaluarluni ilungersuullugu timersuummik aallussinera pissutigalugu, sulorartartutut arlaleriarluni pitsaasunik angusaqartareersoq.

Thora Godtfredsen toqqarneqarpoq utoqqaligaluarluni timersortuarmat timersornermilu sammisani assigiinngitsuni peqataajuarmat - inuusuttanut maligassiuijuarluni.

Susanne Kielsen toqqarneqarpoq kalaallit assassoriaasiannik aallussigami, soorlu kalaallisuuliornermik ingerlatsinermigut allanut ileqqutoqqanik ingerlatseqqilluni.

Bolette Frederiksen ukiuni 47-ni nunatsinni peqqissaasoqarfimmi peqqissaasut ikiortaattut atorfeqarpoq, taakkunannga Marsami ukiut 39-t. Aatsaat 70-inik ukioqarluni soraarninngorpoq.

Benedikte Nielsen Narsami napparsimavimmi ukiorpassuarni sulisimanini pissutigalugu toqqarneqarpoq, taanna napparsimasunit nuannarineqartaqaaq. Taassuma napparsimanera pissutigalugu pania Vivi nersornaatissanik tigusisuuvoq.