Aleqa: Tupaallannanngilaq
Qinersinerup kingorna Siukkunnik suleqateqarniaratik Demokraatit aalajangernerat Siumukkut tupaallaatiginngilaat
- Eqqarsariarnarpoq Naalakkersuisooqatigiinni siuttut assigiinngitsumik oqalunnerat.
Taama oqaaseqarpoq Siumup siulittaasua Aleqa Hammond Demokraatit aalajangereersut qinersinerup kingorna Siumukkunnik suleqateqarniaratik.
Demokraatit aalajangerannut Aleqa Hammond kisimi ileqimisaartunngilaq. Taamatuttaaq pipput Demokraatit naalakkersuisooqataat Inuit Ataqatigiit. IAp politikkikkut oqaaseqartartuata taamatut aalajangerneq narrujuumminarnerarpaa kikkunnillu tamamik suleqateqarusunnertik nalunaarutigalugu.
Atuaruk "IA: Mattussereertoqassanngilaq"
Tupaallanngillat
Taamatuttaaq Kattusseqatigiit Partiianniit nalunaarput taakku aamma kikkunnik tamanik suleqateqarusummata.
Siumukkut aamma tupaallaatiginngilaat Demokraatit taama aalajangernerat.
- Qineqqusaarnerup ingerlanerani tamanna pasitsaakkiartorsimavarput. Tamanna Demokraatit aalajangerneraat uagullu tusaatissatut tiguinnarparput. IA-kkormiut ilaannit aamma tusarparput naalakkersuisooqatigiinneq illersoraat. Allatut ajornaqaaq imatut inernilertariaqarparput: IA-mik taasineq Demokraatinik taasineruvoq Demokraatinik taasineq IA-mik taasineruvoq, Aleqa Hammond Sermitsiaq.AG-mut oqarpoq.
Qinersisartunik isumasiuineq kingulleq Sermitsiap HS Analysemut suliarititaa malillugu Siumup IA-llu arlaat partiini anginersanngorsinnaavoq taamalu naalakkersuisunngortitsiniarluni isumaqatigiinniarnerni siuttuussalluni.
Aamma atuaruk: "HS Analyse: Naligiilluinnarneq"
- Uagut mattussereernianngilagut. Qineqqusaarnermi oqaaserineqartut naalaarpagut aamma atituumik suleqatigiinnissamut periarfissaqarluarpoq, Aleqa Hammond oqarpoq.