D: Arnat amerlanerit politikkimik aallussisariaqarput

Arnat Ulluanni Demokraatinit qinigassanngortittoq Ane Lone Bagger saqqummiussivoq arnat amerlanerit politikkimik sammisaqartariaqalernissaannik, tassunga ilanngullugu Qaasuitsup Kommuniani

Ullumi marsip arfineq-pingajuanni Arnat Ulluanni Demokratit sinnerlugit qinigassanngortittoq Ane Lone Bagger isummersorpoq, Qaasuitsup Kommuniani arnat amerlanerit kommunalbestyrelsinut isertariaqarnerat oqaatigalugu. Assi: Nammineq pigisaq

Qaasuitsup Kommuniani kommunalbestyrelsimut ilaasortanit 21-nit marluinnaat arnaapput.

Neriuutigineqarpoq apriilip aappaanni kommunimut qinersinerup kingorna tamassuma allanngorsimanissaa.

Taamak neriuuteqarpoq Demokraatit sinnerlugit Ane Lone Bagger, Qaasuitsup kommuniani kommunalbestyrelsimi ilaasortat arnartaasa aappaat.

Nunarsuaq tamakkerlugu marsip arfineq-pingajuanni Arnat Ulluanni taamak oqarpoq.

- Arnat angutillu akornanni naligiinnerulernissamik sorsuutiginninnissaq pingaaruteqarpoq, tassani isumaqarpunga nunarsuaq tamakkerlugu arnat ulloqartinneqartarneranni ajornartorsiutit ilaannik saqqummiussisinnaaneq periarfissaasoq pitsaasoq. Uanga paasinnittaasera naapertorlugu arnarparujussuit aappaminnik persuttarneqartartut amerlavallaarput. Ajornartorsiutaavoq arnat nunarsuarmi sumiiffinni assigiinngitsuni atortittartutut tuniniarneqartarnerat. Tamakku nangillugit ajornartorsiutinik assigiinngitsunik taakkartuisoqarsinnaagaluarpoq, Ane Lone Bagger oqarpoq.

Arnat amerlanerit politikkimik suliaqarsinnaasut ujartorneqarput
- Sooruna arnat politikkimik sammisallit taamak ikitsigisut? Qaasuitsup Kommuniani ilaasortanit 21-nit arnat marluinnaavugut. Inatsisartunut qineqqusaartut angutit arnanit amerlanerujussuupput. Ilisimalluinnarpara inuit ataasiakkaat namminneq aalajangigassarigaat qineqqusaartumik sorlermik qinersiumanerlutik. Tassa demokratii demokraatiskimillu ingerlatseriaat taanna 100 procentimik tapersersorpara.

- Taamakkaluartoq oqaatigisariaqarpara iluaqqutaassasoq arnanik amerlanernik kommunalbestyrelsinut ilaasortanngortoqarpat. Ilisimaneqarpoq angutit arnallu assigiinngitsunik soqutigisaqarput. Taamaattumik aalajangiiffigisassanik pingaarnersiuinermilu arnat angutillu peqataanissaat pingaaruteqarpoq, qulakkeerneqassammat pitsaanerpaamik aalajangiisoqarnissaa, Ane Lone Bagger oqarpoq.

Powered by Labrador CMS