Arnat ulluanni suli sorsuutigisassaqarpoq
Siumukartoqaraluartoq pitsanngorsaasoqaraluartorlu suliassaqarfiit ilaanni suli arnat kinguariartorput, qallunaat naligiissitaanermut ministeriat Manu Sareen naliliivoq
Naak arnat ullutsinni angutinik qaangiillutik pitsaanerusunik ilinniagaqalersimagaluartut Nunat tamalaat akornanni Arnat pisinnaatitaaffitik pillugit sorsuutiginninnissaannut marsip arfineq-pingajuat suli pingaaruteqaqaaq.
Taamak isumaqarpoq qallunaat naligiissitaanermut ministeriat, Manu Sareen, Radikaliusoq.
- Isumaqarpunga ulluinnarni unammilligassarpassuarnik naapitaqartartugut, taanna Ritzaumut oqarpoq.
- Arnat angutillu ilinniakkanik aallartitsiniaraanngamik suiaassutsiminnik aallaaveqartarnerat assersuutissaavoq. Aamma suliffissaqartitsinermi arnat siulersuisuni peqataatinneqarnissaat taamatullu assigiimmik akissaasersornissaat suli qulakkeerniartariaqarpoq, Manu nangippoq.
Naligiissitaanermut ministeri tallimanngorpat New Yorkiminngaanniit angerlamut aallassaaq, FN'imi Arnat pillugit ataatsimiititarsuarmi ukiumoortumik ataatsimeeqataareerluni, ataatsimiinneq taanna ingerlanneqartarpoq arnat ulluat sioqqullugu.
Aamma ataatsiminneq assersuutissaqqippoq Nunat tamalaat akornanni arnat ulloqartinneqartarnera siunertaqartoq, Manu Sareen isumaqarpoq.
- Arnat ulluanni naapeqatigiinnissamut periarfissiivoq. Soorlu FN-imi Arnat pillugit ataatsimiititaliami misilittakkanik avitseqatigiiffiusarpoq aamma nunani ataasiakkaani sumut killissimaneq eqqartorneqartarput, nassuiaavoq nangillunilu:
- Isumaqarpunga Arnat Ulluannik aaqqissuussisimaneq iluaqquteqartoq ulloq taanna suli sorsuutigisassaqarneq ersersinneqartarpoq nalinginnaasumik maluginiartanngisavut ersersinniarneqartarlutik.
Dansk Kvindesamfundip siulittaasua Lisa Holmfjord ministerimut isumaqataalluni oqaatigaa suli pitsanngorsaasoqartariaqartoq arnat pisinnaatitaaffii eqqarsaatigalugit - Danmarkimi allaat assorsuaq pitsanngoriartaasunik suliaqartoqarpoq.
- Arnat ilinniaqqinnermut atatillugu peqataallualernikuupput. Sulili procentinngorlugu takuneqarsinnaanngilaq arnat pisortaasartut aamma siulersuisuni ilaasartut amerlassusaatigut, taanna Ritzaumut oqarpoq.
- Inuiaqatigiinni aaqqissuussinerit ilaat pissutaallutik arnat amerlasuut atorfinnik qaffasinnerpaanik pissarsineq ajorput naak piginnaassutsit aallaavigalugit Danmarkimi taamannak ingerlasoqarsinnaagaluartoq.
Arnat Ulluat 1910 aallarnerneqarpoq 1977-imi FN-imi isumaqatigiissutigineqarluni ulloq nalliuttorsiutigineqartassasoq.