N-48 hashimik nukassaatinillu atuinermik pinaveersaartitsissaaq
Ilulissani timersoqatigiiffik N-48 hashimik nukassaatinillu akiuiniarnermi peqatigiiffiuniarpoq maligassiuisoq
Sineriak tamakkerlugu timersornerup iluani ikiaroornartup nukkassaatillu akiorniarnerani Nagdlúngûp siuttuunissaannik siornali aalajangiunneqartoq, suliaralugu aallartippaat, Lena Ravn Davidsen, Nagdlúngûp siulittaasua oqarpoq.
- Taamatut suliniuteqarnerput naalakkersuinikkut nuannarineqarpoq, tassalu, peqqinnissamut naalakkersuisup Agathe Fontainip, Nagdlúnguaq siorna upernaakkut 5000 kr.-ninik akissarsitippaa. Tassalu suliniut maannakkut ingerlavoq, sulilu annertunerusumik ingerlanneqarnissaa pilersaarutigaarput, Lena Ravn Davidsen, Tamanut Avannaanimut oqarpoq.
Sineriak tamakkerlugu timersuutit akimorlugit akiuiniarnermi tunaartaqarnissaq anguniagaavoq, tassalu N-48 siuttoorusuppoq. Aamma anguniarneqarpoq peqatigiiffilerinerup kajuminnartuunissaa.
Nukkassaatinik atuineq nunatsinni inerteqqutaavoq, atuinerlu ersarissigaluttuinnartoq Lena Ravn Davidsenip oqaatigaa.
Inuit unioqqutsissutinik eqqusseriartarput
-Eqqussueriartarnerit takussaagaluttuinnartillugit, akiuiniarnissaq ersarissaanissarlu pisariaqarluinnarput. Inuit nukkassaatinik atuisimasut qanoq pineqarnissaat, peqatigiiffilerinermi ersarissumik tunaartaliuunneqarnikuunngilaq. Peersitaaginnarnermik kinguneqartarnera, tamatuma isumasioqatigiinnikkut sulissutigineqarnissaa anguniarparput.
- Ajortuliorsimasut peersiinnarnagit suliniuteqarfigineqartariaqarput, ajortulioqqinnginnissaat anguniarlugu, immaqalu siunissami inuusuttunut allanut atuinnginissamik kaammattuisartunngornissaat suliniutigissallugu anguniartariaqarpoq, N-48-ip siulittaasua Lena Ravn Davidsen Tamanut Avannanimut oqarpoq.
Tamanut Avannaani sapaatit akunneri tamaasa saqqummersartoq akeqanngitsumik uani aajuk: