KNAPK: Alaskami pissutsit ornippagut
Aalisartut piniartullu kattuffiat KNAPK ilaasortani sinnerlugit siunissamut ernumavoq aalisarnermut politikki ullumikkut ingerlasoq qinersinerup kingorna nangeqqinneqassappat
KNAPKp aarleqqutigaa ukiut tallimat qulit ingerlaneranni aalisartut ikileriangaatsiassasut aalisarnermut politikki ullumikkut ingerlasoq ingerlaannassappat. Kattuffiup aarleqqutigaa sinerissap qanittuani qaleralinniarneq raajarniarnermi pissutsinut assigulerumaartoq tassalu suliffeqarfiit aningaasaatilissuit pisassanik piginnittuulerlutik.
Qineqqusaarnerup nalaani aalisarneq pillugu oqallinneq KNAPK-meersut soqutiginnillutik naalaartarpaat.
- Nassuerutigisariaqarparput Siumup aalisarnermut politikkia soqutigisatsinnut qanittuararsuusoq, KNAPKp siulittaasua Leif Fontaine Sermitsiaq.AG-mut oqarpoq.
Aalisartut ikinnerit
Sinerissap qanittuani qaleralinniarneq annertuumik allanngortitertussanngorpoq. Leif Fontainep aarleqqutigaa Alaskami pissutsinut assigusumik Nunatsinni inissittoqarsinnaasoq.
- Alaskami inuppiaat pisuussutinik uumassusilinnik atuisinnaatitaanerat killilerujussuuvoq illuanik aalisariussuit amerikamiunit pigineqartut imartaanni aalisartut, Leif Fontaine oqarpoq.
- Sinerissap qanittuani aalisartut ikinngitsut ukiut tallimat qulit ingerlaneranni soraarningulerunik pisassatik tuniniartussaavaat. Pisassanik pisinissamut akissaqartutuat tassaapput suliffeqarfissuit aningaasaateqarluartut. Taamaammat pisuussutivut uumassusillit suliffeqarfissuarnit pigineqalertussaapput aalisartullu ikinnerulerlutik. Tassa pissutsit taama ingerlajartulereerput, Leif Fontaine oqarpoq, isertunngilaalu isummatik Siumup politikkianut qanimmata.
Sulisitsisut Peqatigiffiat GA qineqqusaarneq pillugu oqaaseqarumanngilaq.