- Chavez malunnaateqartuuvoq isummanik akerleriinnik pilersitsisarluni
Helle Thorning-Schmidtip Venezuelami innuttaasut misiginneqatiginnissummik nassitsiffigai Hugo Chavezip toquneranik tusarlerneqarnermi kingorna
Ministeriunerup Helle Thorning-Schmidt, Socialdemokratineersup Venezualami innuttaasut eqqarsaatimigut najorpai nunami tassani præsidenti Hugo Chavez marlunngornermi unnukkut nappaassuarmik kræftimik akiuussinnaajunnaarluni anerningernera pissutigalugu.
Thorning ulluni makkunani pisortatigoortumik Tanzaniami tikeraartup, 1999 aallarnerfigalugu Venezuelamik´ præsidenti socialistiskiusoq ima eqqaamaniarpaa.
- Qularutissaanngilaq Chavez innuttaasunit assigiinngitsorpassuit pissutigalugit nuannarineqarluarmat, taamaattumik aamma Venezuelami inuttaasut eqqarsaatigalugit misiginneqatiginnissummik nassiussivunga.
- Chaves malunnaateqartuuvoq isummanik akerleriinnik pilersitsisarluni aamma kikkut tamat tassannga isumaqataajuaannanngillat.
- Taanna maqaasissanerparput?
- Isumaqarpunga pingaaruteqassasoq siumut isiginissaq neriuutigalugulu piffissami qaninnerpaami Venezuelami eqqissisimasumik demokraatiskimillu ingerlatseriaaseq naapertorlugu qinersisoqassasoq
- Danmark aamma Venezuela ukiuni qaangiuttuni imminnut qaninniarpallaarsimanngillat, maakkulli soorunami neriuutigaarput qinersinissamut tunngatillugu eqqissisimasumik ataqqeqatigiittumillu ingerlatsisoqarnissaa.
Hugo Chavez siorna oktobarimi præsidentitut qinigaaqqippoq ukioq manna januaarip qulinganni ukiuni arfinilinni præsidentiusussatut kingumut ivertinneqarluni.
Chavezip toqunerata kingorna ullut 30-t qaangiutsinnagit præsidentissamik nutaamik qinersinissaq suaarutigineqassaaq.
Ilimagineqarpoq qineqqusaartussat pingaarnerit tassaassasut præsidentimut tullersorti Nicolas Maduro aamma Henrique Capriles taanna illuatungiliuttut siuttoraat.
Hugo Chavez 58-inik ukioqalerpoq. Taanna tallimanngorpat ilisaassaaq.