Illarnialeqaat

Quiasaarusiaq ’Aaseralaat’ takuteqqinneqartussanngorpoq aammalu Sisimiormiut meerartaannut takutinneqartussanngorluni. Sisimiuni aliikkusersuineq Nuummi Katuami takutitsinermiit takinerussaaq.

’Aaseralaat’ takutinneqarmat Nuummi soqutiginnittorpassuaqarmat januarimi unnuup ataatsip ingerlanerani marloriarluni takutinneqarpoq. Aamma Ilulissani ullut pingasut tulleriisillugit februaari naalersoq takutinneqarmat inuppassuit takusaapput.

- Sisimiuni takutitsinissatsinni arfinngornermi ualikkut Sisimiut timersortarfiani meeqqanut aamma aliikkusersuiniarpugut. Tassani aliikkusersuinissarput soorunami meeqqanut naleqqussagaassaaq, Piitannguaq Alaufesen Sermitsiaq.AG-mut oqarpoq.

Quianartunik takorusuttut inuit 1.000-it missaanniittut ’Aaseralaat’ Nuummi takuaat tassanilu aliikkusersuineq nalunaaquttap akunnera ataaseq missaliorlugu ingerlanneqarpoq.

- Maanna ’Aaseralaat’ takissusaa tamakkiisoq takutinniarparput. Tassani Piitannguaq Alaufesenilu arlaleriarluta kisimiilluta aliikkusersuisassaagut, Valerius Nielsen Sisimiut timersortarfianni arfininngornermi unnukkut aliikkusersuinissartik pillugu oqarpoq.

Avanersuarmiuusaartoq
Piitannguaq Alaufesen siornatigut quiasaarisarpoq assut nuannerisaasoq ’Uulliarsuaq Aapasoq’ takutillugu. Maanna takutittarpaa ’Kingulliarsussuaq Aapasoq’ Uulliarsuarmut kinguaajutittuusaakkani. Taanna ilaatigut qilaatersorluni illartitsisarpoq.

Sisimiormiuinnaanngillalli ’Aaseralannik’ takusussat. Quiasaarisartut taakku marluk ataasinngornermi martsip aqqarnani Maniitsumi aliikkusersuissapput.
Piitannguaq Alaufesen aamma martsip naanerani Nuummukassaaq Marie Mathiassen peqatigalugu ’Kingulliarsussuaq Aapasoq’ Katuami takutissallugu.