Siumut: erinarsuutit uagut pigaavut
Siumup qineqqusaarutaani videomi ataatami taalliaasa atorneqarnerannik Akitsinnguaq Olsenip nuannarinninnginnera Siumumit ’ajuusaarutigineqarpoq’
Moses Olsenip taalliani Siumumut tunniussarai, taamaattumik taalliai qineqqusaarnermi Siumumit atorneqarput.
Taama Siumup allaffianit saqqummiussisoqarpoq.
Taama pisoqarpoq Siumumik pilersitseqataasup toqoreersup Moses Olsenip pania Akitsinnguaq Olsen ataatami taalliaasa marluk Moses Olsenip ilaqutaanut atuisinnaaneq apeqqutigeqqaarnagu partiip qineqqusaarutitut videoliaani atorneqarsimanerat pillugu pingasunngornermi maani Sermitsiaq.AG-mi Siumumut avoqqaarinnereersorlu.
Moses Olsenip taalliai ’Siulivut maani’ aamma ’Ajugaajumaarpugut’ Siumup qineqqusaarutitut videoliaani atorneqarput.
Taallat taakkua marluk atornissaanut partii pisinnaatitaaffeqartoq Siumumit oqaatigineqarpoq.
- Erinarsuutit Siumup erinarsuutaani siornatigut naqinneqareersimapput cd-nilu marloriarluni saqqummersinneqarsimallutik. Moses Olsenip taallat Siumumut tunniussimavai, tamatumalu qimagunnerata kingorna allanngorsimanissaa ilimaginngilarput, Siumumit oqaatigineqarpoq.
Taallat taakkua marluk partiimit pigineqarnerat Siumumit tassa aalajangiusimaneqarpoq.
Læs "Akitsinnguaq: Siumut skal vise pårørende respekt"
Taamaattumik ajornartorsiutaavoq
-Pisimasoq Akitsinnguaq Olsenimit nuannarineqanngippat soorunami tamanna ajuusaarutigaarput, kisianni taallat Siumumut tunissutaapput, tamannalu Akitsinnguaq Olsenimut marlunngormat uatsinnut allammat aamma nassuiaatigaarput, Siumut Sermitsiaq.AG-nut nassuiaavoq.
Akitsinnguaq Olsen ilaatigut ima oqarsimavoq:
- Kingumut qineqqusaarneqalerporaasiit sunniiniutillu atorneqalertorput. Ilaqutaasutut qanigisaasutullu inussiarnersumik qinnutigissavara ilaqutaasugut apereqqaarneqartarnissarput, toqukkut qimagutereersup suliai atorniarneqartillugit, pisumi tamanna ingerlanneqanngimmat. Siumut-miillu atuissaguni taallaq tamakkerlugu atortariaqarluarpaa ilaannakornagu.