DR-ip aatsaat qinersiviuk unnukkuani oqallineq aallakaatissavaa

Tupigusuutigineqarpoq DR2-p arfininngorpat Nuummi Debattenip immikkut ittumik immiunneqarneranit aallakaatitassaq sooq qinersinerup unnukkuani aatsaat aallakaatinneqassanersoq

DR-ip Debattenimik Clement Kjersgaard aqutsisoralugu oqallitsitsinissaa arfininngorneq nal. 10.30 Nuummi GU'p timersortarfeeraani aallartissaaq, kikkulluunniit isiginnaariarnissaminnut periarfissaqarput. Assi: Ole Lind/Polfoto

Clement Kjersgaard aallakaatitsivimmiittoralugu DR-imi oqallinnermik aallakaatinneqartartut pingaarnersaat 'Debatten' Inatsisartunut qinersinissaq sioqqullugu arfininngornermi immikkut ittumik aallakaatitassaq immiunneqassaaq.

Sermitsiaq.AG-p atuartartuisa tupigusuutigaat DR2-p oqallinnermik aallakaatittagaa soqutigineqaqisoq ilaatigut Naalakkersuisut siulittaasorigallagaata Kuupik Kleist, Inuit Ataqatigiit, aamma Siumut-siulittaasuata Aleqa Hammond oqalliseqataaffigisassaat aatsaat ulloq qinersivik marsip aqqaneq-aappaat DR2-kkut nal. 21.00 aallakaatinneqassaaq.

Piffissami tassanerpiaq nunatsinni qinersisinnaasut qinersinissaminnut periarfissaraat kingullerpaaq.

- Piffissaq aallakaatitsiffiusoq DR-ip nunatsinni qinersinermit aallakaatitsinerata ilaannut atassuteqarpoq, 'Debatten' aallakaatinneqartussat ilaannarimmassuk, Nikolaj Vitting Hermann DR2-mit oqarpoq

Aallakaatitassanik immiussineq arfininngornermi nalunaaqqutaq 10.30 Nuummi GU-p timersortarfeeraani ingerlanneqassaaq kikkulluunniit tusarnaariarsinnaallutik.

Powered by Labrador CMS