Qallunaatut piginnaasakinneq ajornartorsiutaavoq
Avannaani Ilinniarnertuunngorniarfimmi ilinniartut amerlavallaartut qallunaat oqaasiinik piginnaasakippallaarput – tamannalu angusaqartarnermut killilersuivoq
Avannaani Ilinniarnertuunngorniarfik Aasianniittoq atuagarsornikkut ilinniakkanut allanut ingerlariaqqiffissatut aqqutissaavoq ukiuni pingasuni ingerlanneqartartoq, ukiulli pingasut ingerlanerat ilinniartorpassuarnut atuagarsornikkut artorsarfiusumik ingerlalertarpoq, qallunaatut piginnaasakippaallarneq pissutigalugu.
Ilinniarnertuunngorniarfik maannakkut 340-t missaannik ilinniartoqarpoq, taakkunanngalu amerlavallaartut oqaatsitigut ima ajornartorsiortigaat – qallunaat oqaasiinik minnerpaamik naliginnaasumik piginnaasaqarnissamut piumasaqaammik naammassinnissinnaanatik, naak atuartitsinermi oqaatsit atorneqartut pigaarnerpaartarigaluaraat.
Ilinniarnertuunngorniarfimmi ilinnialertartut ukiuni kingullerni ukiukilliartorsimapput, ilaatigut meeqqat atuarfianni 11. klassip atorunaarsinneqarnikuuneranik pissuteqartumik. Maannakkut ilinniarnermik aallartitsisartut naliginnaasumik 16-17-inik ukioqartarput, aammali ilaatigut 15-inik ukioqartarlutik.
Avannaani Ilinniarnertuunngorniarfimmi rektori Flemming Guntofte Rasmussen oqarpoq, ilinniartut ilai qallunaatut atuarniarnikkut assut ajornartorsiuteqaannaratik aammali oqaatsit taakku atorlugit eqqarsarniarneq ajornartorsiutigisaraat. Tamatumunngalu pissutaasut ilagaat ilinniarlerlutik aallartittartut ukiukissinnaasarmata, rektor isumaqarpoq.
Qallunaatoorsinnaanerat ajornerulersimavoq
- Pissutaasut ilagisinnaavaat immaqa meeqqat atuarfianni atuartut qallunaatut ilikkagaqarpallaarneq ajormata aammali ulluinnarni qallunaat oqaasiinik atuisuuneq ajorput, Flemming Guntofte Rasmussen oqarpoq.
Ilinniarnertuunngorniarfimmi ilinnialissalluni aallartinnissamut piumasaqaatit sakkukippallaalersimannginnerarpai, oqaatigalugulu politikkikkut piumasarineqarlunilu kissaatigineqarmat sapinngisamik amerlanerpaat siusissukkut ilinniakkamik aallartitsisarnissaat.
Ukiulli siuliinut naleqqiullugu inuusuttuaqqat qallunaatut piginnaanikinnerulersimaneri annertuumik ersarittoq oqaatigaa.
- Siusinnerusukkut sungiusimaannarsimagaluarparput maani ilinnialertartut qallunaat oqaasiinik piginnaaneqarluartuusartut, ilaatigut marluinnik oqaaseqartunik angajoqqaallit amerlanerusut ilinnialertarsimammata. Massakkut amerlasuut angajoqqaavi annerusumik kalaallisuinnaq oqaaseqartuupput. Tamanna ima kinguneqartarpoq oqaatsit allat atorneqarpiarneq ajorlutik. Angajoqqaat ilaai maanga saaffiginnikkaagamik kalaallisut oqaasilimmik oqaloqateqarusunnerusarput.
Qaasuitsup kommuniani susoqarnersoq sapaatip akunneranut saqqummertartumi Tamanut Avannaanimi oqaluttuap sinnera atuaruk. Aviisi akeqanngitsumik uani pisiariguk: