Sermitsiaq.AG 2012-imi angusarissaarpoq

Aningaasaateqarfik inuussutissarsiummik ingerlataqartoq Mediehuset Sermitsiaq.AG 2012-imi akileraarutit ilanngaatigereerlugit 4.741.218 koruuninik sinneqartoorpoq

Tusagassiorfik Sermitsiaq.AG-p saqqummiussai. Assi.: Leiff Josefsen

Akileraarutit ilanngaatigereerlugit 4.741.218 koruunit.

Aningaasaateqarfik inuussutissarsiummik ingerlataqartoq Mediehuset Sermitsiaq.AG 2012-imi taama sinneqartooruteqarpoq, taakkualu ukiup siuliani angusanut 3.142.000 koruuninut sanilliullugit malunnaateqarluartumik pitsanngoriaataapput.

Angusat aviisit marluk akornanni kattunnerup iluatsilluarsimaneranik ersersitsisut Kalaallit Nunaannilu kiffaanngissuseqartumik attuumassuteqanngitsumillu naqitatigut tusagassiuuteqarnermik qularnaarisut ulluinnarni aqutsisunit siulersuisunillu naammagisimaarneqarput.

Angusat ’kusanartut’ pilersinneqarput unammilleqatigiinneq sakkortunerulersimagaluartoq naammassisaqarsinnaassutsillu sukumiinerulersinneqarneranik tunisassiornerullu pisariillisarneqarneranik pissuteqarlutik.

Sermitsiaq.AG-p 2012-imi ilanngaatissat suli ilanngaatiginagit isertitai 21.147.628 koruuninik amerlassuseqarput, 2011-mi 19.156.000 koruuniusimallutik, tamatumalu kinguneranik nammineq aningaasaatit maanna 10.688.515 koruuninik amerlassuseqalersimallutik, ukiup ataatsip matuma siorna 5.947.000 koruuniusimallutik.

Nittartagaq siuariaateqarluartoq
Nittartagaq nutaarsiassaqartitsivik www.Sermitsiaq.AG Kalaallit Nunaanni alakkarneqarnerpaasarpoq, alakkaasartullu amerlassusaat suli qaffakkiartorlutik. Taamaalillutik alakkaasut amerlassusaat 2011-mut sanilliullutik 30 procentit sinnerlugit qaffariarsimapput.

Nittartagaq suliffissanik inuttassarsiuussisarfiit nunatsinni alakkarnerpaartaannik aamma imaqarpoq, Sermitsiaq.AG/JOB, 2011-mi 8 millionit missaannit alakkarneqarsimasoq.

- Ussassaaruteqartarneq taamalu aamma ussassaarutinik nittarsaassineq ukiup siulianut sanilliullugu aamma qaffariarsimavoq.

2012-imi aviisinik tunisaqarnermi kaaviiaartitat 8.964.000 koruuniupput (2011-mi 8.905.000 koruuniullutik. Aviisit taakkua marluk naqinneqarnerminni amerlassuserisartagaat nunani killerni pissutsit assigalugit 2011-mi ikiliartorsimapput. Akerlianik aviisinik elektroniskiusunik tunisat amerliartorput.

2012-mi aningaasarliorneq aviisini ussassaarutitigut kaaviiaartitanut aamma malunniussimavoq, atorfinnik inuttassarsiuussilluni ussassaarutit suli appasissumiimmata. Taamaakkaluartoq ussassaarutitigut kaaviiaartitat ukiup siulianut sanilliullugit 1 million koruunit missaannik qaffariaateqarsimapput.

Saqqummersitat nutaat
Aningaasarliortoqaraluartoq tunisassianik nutaanik marlunnik ineriartortitsisoqarsimavoq: Atuagassiaq ”Oil & Minerals”, nittartakkakkut aamma pisartakkatut saqqummersinneqartoq, tamatumalu saniatigut Tamanut Avannaani Qaasuitsup Kommuniani saqqummersinneqartartoq.

Aamma Nuuk Lokalreklame A/S, Nuuk Ugeavisimik saqqummertsisartoq, siuariarsimavoq.

Nuuk Lokalreklamemi akileraarutit ilanngaatigereerlugit angusat annikikkaluamik 473.285 koruuninik sinneqartooruteqarfiupput, Sermitsiaq.AG-mi naatsorsuutinut ilanngunneqartunik, 2011-mi 377.000 koruuninut sanilliullugu.

Powered by Labrador CMS