S: Ineqarnermut akiliisartut pillarnagit
Siumut tunuliaqutaralugu Inatsisartunut qinigassanngortittoq Kim Kielsen isumaqarpoq, ineqartut akiliisuaannartut akiliinngitsoortut akiitsui akilertarunnaartariaqaraat
Ilumoorsinnaanngilaq ineqarnerminnut attartortut akiliisuaannartut ineqarfii akitsorneqartassasut allat akiliinngitsoorsimanerat pissutaalluni.
Siumut tunuliaqutaralugu Inatsisartunut qinigassanngorteqqittoq Kim Kielsen oqarpoq.
- Sooq nunatsinni inissianik attartortartorpassuit akiliinissaminnut naalagarsiortut nunatsinni inissianik attartortut akiliutinik paarsineq ajortut imaluunniit akiliinissaminnut ajornartorsiortut akiligassaasa annertoqqataannik “pillaatitut” akiliisittassavagut? Attartortut ilaasa inissianut attartukkaminnut akiliisinnaannginnerat akileerusunnginneralluunniit patsisigalugu najugaqartunut allanut nammakkiutigineqarnissaa pissusissamisoorpa?, Kim Kielsen aperaaq.
Allat akilissavaat
Kim Kielsen isumaqarpoq, pisortanit inissianik piginnittunillu tamakku akilerneqartariaqartut.
- Ineqarnerminnut akissaqarluarlutik akiliineq ajortut imaluunniit akiliinissaminnut aningaasatigut ajornartorsiortut saniliisa akiliiuannartut nammannagu pisortat aammalu piginnittut nammattariaqarpaat.
- Soorlu Nukissiorfinnut tunngatillugu allannguisoqarnissaa, Inatsisartut tamarmiullutik ukiakkut 2012-mi ataatsimiinnermi suliakkiutigisaat assersuutigineqarsinnaasoq, taamaasilluni akiligassaq inunnut ikitsuinnarnut nassiunnagu piginnittunulli tamanut nassiunneqartalernissaa kissaatigineqarluni, Kim Kielsen oqarpoq.