S: Aatsitassanut aningaasaateqarfik ima isikkoqassaaq

- Nuna Minerals pitsaasorujussuarmik suliaminik ingerlatsivoq, Kalaallilli Nunaata nammineernerulernissaa siunissamut ungasinnerusumut isigaluta anguniagaqartariaqarpugut.

Siumut tunuliaqutaralugu Inatsisartunut qinigassanngortittoq Kenneth Rasmussen oqarpoq.
Kenneth Rasmussenip assersuuppaa Norge Statoileqarmat kiisalu Dong Danmarkimi ingerlanneqarmat.

- Ingerlatseqatigiiffiit taakku akuersissutinik nutaanik tunniussinerni piginneqataassutsinik tigumminniinnartarput, taamaalillutik inuiaqatigiit ingerlatseqatigiiffiisa sulineranni malinnaapput sunniuteqarlutillu.

- Tamatumalu peqatigisaanik piginneqataassutsit annertoqqataannik sinneqartoorutinit pissarsinissaq qulakkeerneqartarpoq. Taamatut aaqqissuussineq torrallataavoq, taamaattorli Nuna Mineralsip nunami aatsitassarsiornerni suliniutinik tuniniaalernerani periuseq tamanna atorneq ajorparput, tamannalu pitsaanngitsuusutut Siumup Inatsisartunut qinigassanngortitaata, Kenneth Rasmussenip isumaqarpoq.

Siunissaq eqqarsaatigineqassaaq
- Naalakkersuisut aqqutigalugit pisortat suliffeqarfiutaasa inuiaqatigiinnut sapinngisamik pitsaanerpaamik kinguneqartumik ingerlanneqarnissaat Inatsisartut akisussaaffigaat. Imaassinnaavoq matumani siunissaq ungasissoq isigalugu eqqartuisugut, taamaattoq isumaga naapertorlugu aallaqqaataaniilli aatsitassanut aningaasaateqarfiup erniai atorlugit siunissami aningaasaateqarfiup suli amerlanerusunik isertitaqarsinnaanera qulakkeerniartariaqarparput.

- Taamatut periuseqarsinnaanerup oqaluuserinissaa isumaqatigiissuteqarsinnaanerlu pingaaruteqarpoq, matumanimi pisuussutivut aatsitassat siunissatsinnik qulakkeerinnittussat pineqarput. Kenneth Rasmussen oqarpoq.