Atuanngitsoorneq sms-erutigineqartassaaq
Sisimiuni Nalunnguarfiup Atuarfiani atuartut angajoqqaavi siunissami sms’erfigitittalersinnaapput meeqqat peqquteqaratik atuanngitsooraangata
Peqquteqarani atuanngitsoorneq sineriammi atugaaqisoq Sisimiormiut aamma nalunngilluarpaat, angajoqqaarpassuillu nalusarpaat meerartik atuanngitsoorsimanersoq. Maanna Nalunnguarfiup Atuarfia piareerpoq meeqqat atuanngitsoorneranni angajoqqaat sms’erfigalugit ilisimatitsisarnissat misiliutiginissaanut.
Meeqqat atuarfianniit soraarummeersut ilinniakkamik aallartitsinngitsoortartut ikilisarnerat Qeqqata Kommuniata pimoorullugu ingerlappaa. Atuartullu ilarpassui ilikkagassaminnik pissarsinngitsoortarput peqqutissaqanngitsumik atuanngitsoortarneq pissutigalugu.
- Angajoqqaarpassuit isumaqartarput meerartik ullaakkut anigaangami atuarfiliartartoq. Ilaatigut piffissaq sivisooq ingerlareersoq aatsaat angajoqqaat paasilertarpaat meeraq atuarnermi malinnaanngitsoq, Nalunnguarfiup Atuarfiani pisortaq Jonathan Petersen Sermitsiaq.AG-mut oqarpoq.
Imminut akilersinnaavoq
Taamatut aaqqissuussineq qanoq akeqassanersoq Nalunnguarfiup Atuarfiata naatsorsorsimavaa.
- Akia koruuninngorlugu taanianngilara. Kisianni qularutiginngilara taamatut aaqqissuussineq imminut akilersinnaasoq. Taamatut periuseqarnissamut periarfissaqareerpugut atuarfiup intranetia atorlugu, Jonathan Petersen oqarpoq.
Taamatulli aaqqissuussineq aatsaat atulersinnaavoq angajoqqaat akuersippata. Piareersaatit atuarfiup siulersuisuinut ilisimatitsissutigineqareerput aammalu kommunalbestyrelsep ileqquusumik ataatsimiinnermini februaarip 28-ani eqqartoreerlugu.
- Angajoqqaanut toqqissisimanarnerulissaaq naatsorsuutigisinaalerunikku meerartik atuarfimmiittoq, Jonathan Petersen oqarpoq.