AGF-akiliisinnaajunnaarmat: Asii ungasissumut aaqqiissuteqaqqusivoq

Borgmester Asii Chemnitz Narup naalakkersuisunik tapersersuivoq Arctic Green Food akiliisinnaajunnaarnerata kingorna

Asii Chrmnitz Narup, Kommuneqarfik Sermersuumi IA borgmesterip Arctic Green Foodip akiliisinnaajunnaarnerata kingorna Naalakkersuisut tapersersornerarpai. Assi: Kommuneqarfik Sermersooq

- Arctic Green Foodip akiliisinnaajunnaarnera kiisalu Aalisarnermut, Piniarnermut Nunalerinermullu Naalakkersuisuugallartup, Ane Hansenip, AGF-p tunitsiveqarfigisimasaani tunitsivinnik qularnaariniarluni oqarnera pillugu – uanga Kommuneqarfik Sermersuumi borgmesteritut tamanna taamaallaat tapersersorsinnaavara.

Taama allappoq Asii Chemnitz Narup, IA-borgmesteri.

- Uannut pingaaruteqarpoq erseqqissassallugu, kiffartuussinermut isumaqatigiissut pisussaaffiliimmat. Ittoqqortoormiini tunitsivik 2008-mili uninngavoq, tamannalu illersorneqarsinnaasimanngilaq illersorneqarsinnaananilu. Illoqarfimmuinnaanngitsoq – aamma tunisisartunut ataasiakkaanut. Taamaattumik pingaartorujussuuvoq ataavartumik ungasissumullu isigaluni tunitsiveqarnerup aaqqiiffigineqarnissaa – aamma Ittoqqortoormiini, Asii Chemnitz Narup tusagassiivinnut allappoq.

Tunitsiviit tamaasa eqqaamallugit

Suliniutaasut tapersersorpakka, aalisartunik piniartunillu suannik tunisisangajalersunik qularnaarisussat. Aammali taama pingaartigaaq, upalungaarsimasut AGF-p siunissaa pillugu nalilersuisussat eqqaamassammatigit kiffartuussinissamut isumaqatigiissummi taaneqartut tunitsiviit tamaasa. Upalungaarsimasunit tunitsiviit ingerlasut kisimik qiviarneqassanngillat aammali tunitsiviit – teknikkikkut ajornartorsiuteqarneq pissutigalugu uninngasimasut aaqqiivigineqartariaqarput – soorlu Ittoqqortoormiini tunitsivik, borgmesteri erseqqissaavoq apriilip aappaani kingumut kommunimut qineqqusaartoq.

Arctic Green Food februaarip 28-ani akiliisinnaajunaarpoq.

Powered by Labrador CMS