Ane Hansen: AGF-ip ingerlanera malinnaaffiginikuuarput
Naalakkersuisut Arctic Green Foodimut malinnaanngippallaarsimasutut Atassutip isornartorsiuinera, politikkikkut akisussaasup Ane Hansenip ilumuunnginnerarpaa
- Soorunami Arctic Green Foodip inissisimanera malinnaaffigaarput, suliffeqarfimmi sullissinermut isumaqatigiissuteqarfigigatsigu.
Piniarnermut Aalisarnermut Nunalerinermullu politikkikkut akisussaasoq IA-mit Ane Hansen oqarpoq.
Taama akissuteqarpoq ataasinngornermi Atassummit Ove Thomassenimit sakkortuumik Naalakkersuisunut isornartorsiuereerneratigut.
Atassut tunuliaqutaralugu politikkeri isumaqarmat Naalakkersuisut Arctic Green Foodip inissisimaneranut malinnaanerusariaqarsimagaluartut.
Malinnaaffigilluarneqarpoq
Suliffeqarfilli februaarip 28-ani akiliisinnaajunnaarluni matusariaqalersoq malinnaarfigilluarneqartoq Ane Hansen nassuiaavoq.
- Suliffeqarfimmut piumasarinikuuarput ukiumut marloriarlutik nalunaaruteqartassasut. Sullissinissamik isumaqatigiissummi arlaannik pissusissamisut ingerlasoqanngikkaangat suliffeqarfik nalunaarfigisarparput ajornartorsiut iluarseqqullugu. Assinganik suliffeqarfimmut taama isiorpugut, Ane Hansen Sermtsiaq.AG-mut apersorneqarnermini oqarpoq.
Politikkikkut akisussaaffimminiilluni suliffeqarfiup nunaqarfinni aaqqissussani siuariartortoqanngitsut takuaa.
- Sullissinissamut isumaqatigiissummi allaqqavoq nunaqarfinni tunitsivinnik ammaassuisoqassasoq, taamaattoqanngimmallu siulersuisut saaffigaagut.
Pisaqartoqarpianngilaq
Jacob Abelsenip qaqilernikuuaa ilaqutariit 200-ut Arctic Green Foodip akiliisinnaajunnaarluni matuneranut eqqugaasut.
Kisitsilli taama annertutiginngitsoq Ane Hansenip oqaatigaa.
- Oqaatiginiarneqarpoq ilaqutariit 200-ut eqqorneqartut, tamannali ilumuunngilaq. Kvartalimi kingullermi takusinnaavarput aalisartut piniartullu 32-t pisaminnik Arctic Green Foodimut tulaassisimasut, suliffeqarfimmilu sulisut 36-ullutik. Tulaassuisumanerni annikitsuinnarmik Arctic Green Foodimut tulaassisoqarsimasoq takusinnaavarput.
- Uannut pingaarnersaavoq aalisartunut, piniartunut akissarsiortunullu siunissami qaninnerpaami aaqqiisoqassasoq – ajortuliortunik ujarlernermiit suliarerusunneruakka