A: Naalakkersuisut AGF-ip akiliisinnaajunnaarneranut pisooqataapput
Ove Thomassen, Atassut, isumaqarpoq Naalakkersuisut Arctic Green Foodip akiliisinnaajunnaarneranut pisooqataasut. Arctic Green Foodip inissisimaneranut malinnaanerusariaqarsimasut isumaqarluni
- Naalakkersuisut pikkorliornerat kingunerivaa maannakkut aalisartut piniartullu tunitsivissaarunnerat nunamilu sulisut suliffissaarunnerat, Atassut sinnerlugu Inatsisartunut qinigassanngortittoq Ove Thomassen oqarpoq.
Naalakkersuisut kiffartuussinermik isumaqatigiissummut malinnaasimanerusuuppata AGF-ip februarip 28-ani akiliisinnaajunnaarnera pinngitsoorneqarsimasinnaagaluartoq isumaqarluni.
- Artic Green Food akiliisinnaajunaarnera siusinnerusukkut ilisimaneqartariaqaraluarpoq Naalakkersuisut kiffartuusinissamik isumaqatigiissuteqarnerat eqqortumik malitsinneqarnersoq malinnaaffigisimasuuppassuk. Naalakkersuisutigoorlugu sullissinissamik isumaqatigiissuteqartoqartoq oqartussaaffik aamma isumaqatigiissummi atsiorsimasut akisussaaqataanerpaapput, Ove Thomassen oqarpoq.
Nassuiaasoqartariaqarpoq
Atassut tunuliaqutaralugu politikkeri isumaqarpoq, Aalisarnermut Piniarnermullu Naalakkersuisuugallartoq Ane Hansen, nassuiaasariaqartoq.
- Aalisarnermut naalakkersuisup akisussaaffimminik allanut saatitsiniarnera sakkortunerpaamik utertinneqartariaqarpoq aammalu eqqorneqartunut nassuiaateqartariaqarluni, Ove Thomassen oqarpoq.
AGF-ip akiliisinnaajunnaarneranut eqqorneqartut, tassa aalisartut piniartullu, nassuiaaffigineqartariaqartut isumaqarluni.
- Aalisartut piniartullu tunisat naliinik pissarsinissaat qularnarmat aammalu sulisut ajinngitsorsiassaat tunniunneqarnissat qularnaarneqaratik, Ove Thomassen nassuiaavoq.
Naalakkersuisut kukkupput
Ove Thomassen maannakkut Naalakkersuisuusut suliffimminnut naleqqutinngitsut isumaqarpoq.
- Pikkorliornerup kingunerivaa maannakkut aalisartut piniartullu tunitsivissaarunnerat nunamilu sulisut suliffissaarunnerat. Tupigusuutiginanngitsiinngilarli Naalakkersuisut siulittaasuata qisuariarnera kingusingaarmat ilaqutariiparujussuimmi eqqorneqarput akissutisinissamillu utaqqillutik, Ove Thomassen oqarpoq.
Sermitsiaq.AG una pillugu Aalisarnermut Piniarnermut Nunalerinermullu Naalakkersuisuugallartoq Ane Hansen, IA, oqaaseqartinniaraluarpaa iluatsinngitsumik. Ullup ingerlanerani oqaaseqarsinnaasoq, allattaa nalunaarpoq.
Ane Hansen AGF-ip akiliisinnaajunnaarneranut nammineq pisuusoq Sermitsiaq.AG-mut oqaaseqarnikuuvoq.