Niaquarnaveeqqut atorsiuk!
Sisorariarnermi niaqorornaveeqqut atoruk. Nuummi sisorartarfiutillit maannakkut kaammattuuteqarput. Sisorarfik angineq aamma ammangajalerpoq
Inuit amerlanerujartortut niaqorunnaveeqqut sisorarnermi atortunut ilaatilersimavaat. Sisorar fiilli siulersuisuisa kissaatigaat sisorartut tamarmik sisutinnatik niaqorunnaveeqquteqartarnissaat.
Sisorarfiit siulersuisuini ataatsimiinnermi kingullermi akuersissutigineqarpoq siunissami sulisut sisorarnermillu ilitsersuisut niaqorunnaveeqquteqartassasut taamaalillutillu maligassiuillutik ingam mik meerapassuarnut sisorariartunut.
Aamma innersuussutigineqassaaq februaarip aallaqaataannit sisorartut tamarmik pinngitsooratik niaqorunnaveeqquteqartarnissaat majuartaat angineq atoraangamikku.
– Majuartaatinik atuisut tamaasa sakkortuumik kajumissaassavagut innersuussut malittassagaat. Minnerunngitsumik namminneq isumannaatsuunissartik peqqutigalugu, Sisorarfiit siulersuisui nalunaarput.
Akeqanngitsumik?
Nunarsuarmi sumiiffinni arlalissuarni ilaatigut Østrigemi qaqqarsuarni alpini sisorariartarfiit nuannarineqarluartut ilaanni Italiamilu meeqqat tamarmik 15it inorlugit ukiullit inatsisit malillugit niaqorunnaveeqquteqartussaapput.
Norgemi Sverigemilu tamanna suli inatsisitigut piumasaqaataanngilaq, sumiiffippassuarnili meeqqat akeqanngitsumik majuartaatit atorsinnaavaat niaqorunnaveeqquteqarunik. Immaqalu tamanna peqqutigalugu Sverigemi Norgemili sisorariartarfinni meeqqamik niaqorunnaveeqquteqanngitsumik takoqqarnarpoq. Immaqa tamanna Sisorarfinnut isumassatsialaavoq.
Niaqorunnaveeqquteqarnissamut tunngavilersuutigineqartoq ersarippoq: Misissuinerit takutippaat niaqorunnaveeqqutit atoraanni ajutoornerit 85 procentiini niaqukkut ajorusernissaq qaratsamillu sajuppillatsitsinissaq pinngitsoortinneqartarmat.
Nuuk Centerimi Ittu.netimi piginittoq Stefan Hviid (Ittutut ilisimaneqarnerusoq) oqaluttuarpoq meeqqani niaqorunnaveeqqutit 499 koruuniniit qummut akeqartut.
– Assigiinngitsorpassuit pigaavut. Siusinnerusukkut ilaat angillutillu aotruminaassinnaasarput, maannakkulli torrannerupput mikinerullutillu, taamalli qajannaatsigalutik. Ullumikkut niaqorun naveeqquteqartariaqarpoq, angajoqqaallu tamarmik Sisorarfiit suliniutaat tapersersortariaqarpaat. Ullumikkut ikinnerit niaqorunnaveeqquteqarneq ajorput, oqarpoq.
Sisorarfik angineq ammaliivippoq
Sisorarfik angineq sapaatiummat tamangajaat ammatinneqarpoq, affaannaa ammatinneqartarsimagaluarluni. Sisorartarfiup sinnera ammangajalerpoq. Sisorartarfik sapaatiummat suliarineqarluarsimavoq.