Inuit nuna tamakkerpaat
Kalaallit Danmarkimiittut peqatigiiffiisa kattuffiat Inuit maanna 23-nik immikkoortortaqalerpoq
Arfininngormat marsip 2-ani Horsensimi nalinginnaasumik ataatsimeersuarnermi 42-t peqataapput taakkunannga 16-it taasissinnaasutut aallartitat, alaatsinaatsut kiisalu Inuimut ilaasortanngornissaminnut qinnuteqartut.
Sjælland tiguarneqarpoq
Kingullermik ataatsimeersuartoqarmat peqatigiiffik ”Qullissat Ikinngutai” kattuffimmut ilaasortaajunnaarpoq. Maannakkulli marluk ilanngupput. Taakkulu qinnuteqaataat ataatsimeersuarnermi isummerfigineqassapput. Århusimi ”Iserfik Nutaaq” Københavnimiillu ”MIK” Inuit anguniagaannik naammassinnikkanik nuannaarutaaqisumik kattuffimmut Inuimut ilaasortanngorput. Taamaalilluni Sjælland aamma ilaalerpoq Københavnimi MIK ilanngummat, taamaalillunilu Inuit Danmark tamakkerpaat.
Siulittaasoq qinigaaqqippoq
Siulittaasoq Bitha Metelmann unammillerteqarani qinigaaqqippoq soorlu aamma siulittaasup tullia Niels Peter Nielsen siulersuisuniissimasullu amerlanerit qinigaaqqillutik. Ataaseq taamaatikkusussimavoq allamillu taarserneqarluni tassaavorlu Karl Rafaelsen – Kaaleeraq (”SmåKarl”), Aalborgimi Ikinngutigiinniit.
Aningasakilliorput
Inuit nuannarinteqaqisunik ukiumoortunik aaqqissuussisarput soorlu Tusariarlinngooq, TUSA, kiisalu Julehilsen til Grønland peqatigiiffinnillu ilaasortaasunik pikkorissaasarlutik. Pisarnertut aningaasanik amikkisaarneq, namminersorlutik oqartussani takiissutit angissusaasa nalornissutigineqarnerat sulilu marsip qaammataani nalunaarutigineqanngitsoq ataatsimeersuarnermi oqaluuserineqarput, taamaattumik siulersuisut nutaat neriulluarput sulinissaminnullu eqqissisimanissaminnik taamaalillutik ukiuni aggersuni aaqqissuussinerit pilersaarusiorsinnaallugit.