AGF: Akiliisinnaajunnaarneq SIKp ajusaarutigaa
Arctic Green Foodip akiliisinnaajunnaarnerani SIKmi ilaasortarpassuit suliffissaarupput. Taakkuli suliffissaarunnermi aningaasaateqarfimmut annaasatik akilertinniarsinnaavaat
Arctic Green Foodimi akiliisinnaajunnaartoqarneratigut suliffiit 300-ut missaat annaaneqarput SIK-milu ilaasortarpassuit eqqugaasunut ilaapput.
- Suliffissat taama amerlatigisut annaaneqarmata aammalu ilaasortarpassuagut eqqugaasussanngormata assut ajuusaarnarpoq, sulinermik inuussutissarsiuteqartut kattuffianni SIK-mi siulittaasoq Jess G. Berthelsen Sermitsiaq.ag-mut oqarpoq.
Taamaattoq sulisartut akissarsiassaraluaminnik annaasaqartut suliffissaarunnermi aningaasaqarteqarfik lønmodtagernes garanti fond aqqutigalugu aningaasat annaasatik utertinniarsinnaavaat. Taamaattoq suliat tassani sivisuumik naammassiniarneqarsinnaasarput.
Arctic Green Foodip akiliisinnaajunnaarnerata nunaqarfinni isorliunerusunilu tunisassiorfinnut namminersortut aningaasaleerusussinnaanerat kajuminnarnerulersissimanavianngilaa.
- Arctic Green Food akiliisinnaajunnaarpoq nunaqarfippassuarni tunisassiorneq imminut akilersinnaanngimmat. Soorunami ataasiakkaaqarpoq akilersinnaasumik ingerlatsiffiusunik. Kisianni namminersortunut kajuminnarnavianngilaq amigartooruteqarfiulluni ingerlareersunut aningaasaliinissaq, Jess G. Berthelsen neriulluarpasippallaarani oqarpoq.