Ilimmarfimmi qineqqusaartitsineq neriorsuutitaqanngitsoq
Nuummi Ilimmarfimmi qineqqusaartitsineq sisamanngormat ilinniartunik sukangasuumik aqunneqarpoq. Taamaasilluni qineqqusaartut arlaannaalluunniit neriorsuuteqarluni oqaaseqanngilaq
Ilisimatusarfimmi ilinniartut Inatsisartunut qinersinissamut martsip 12-ani qineqqusaartitsimmata sisamanngornermi ualikkut tusarnaarianit amerlanernit iluatsilluartutut oqaatigineqarpoq.
Aaqqissuisunit piumasaqaataavoq qinigassanngortittut apeqqutit naatsumik ersarissumik akisassagaat. Neriorsuuteqaruniarunillu nassuiassavaat aningaasat suminngaanniit aassanerlugit. Taamaasilluni qineqqusaartut arlaannaalluunniit neriorsuuteqarluni oqaaseqanngilaq. Qinigassanngortittut apeqqutit tamaasa minutsip ataatsip iluani akisarpaat, ilai marloriarlutik oqaaseqartarput.
Partiit tallimat qinigassanngortittorlu ataaseq Max Madsen oqallinnermi peqataapput. Ilinniartut sulisut avataaniillu peqataasut 150-it takkupput.
Partiit akioriinnerat 20 munutsimik uummaarissumik ingerlanneqarpoq, kingorna akunnermi ataatsimi apeqqutit akisaqattaarlugit oqallipput. Nutserisoqanngilaq, oqaatsit atorusat atorneqarput.
Apeqqutit tamatigoortut
Ilinniartup ilaata paaseruppaa partiit qanoq isillutik Ilismatusarfimmi ilinniarnerminnik unititsiinnartartut akiorniarneraat, allallu apeqqutigaa qanoq isilluni tikisitat amerlassusaat apparsarniarneraat.
Ilinniartup ilaata paaserusuppaa partiit qanoq isiorniarnersut Arctic Green Food-tip akiliisinnaajunnaarnera pillugu iliortoqassanersoq. Naalakkersuisut siulittaasorigallagaat Kuupik Kleist, IA, partiit tamaasa qinersinnginnermi ataatsimeeqatigiumavai suliffeqarfik pillugu qanoq iliuuseqassanerlutik. Qaaqqusissutaa tamanit ilassilluarneqarpoq.
Katrine Strøm-ip 14-inik ukiullip Nuuk International Friskolemi atuartup paaserusuppaa qinigassanngortittut qinigaagunik atuarfinni pissutsit qanoq pitsanngorsarniarneraat. Kissaatigaa atuarfiit nukittorsarneqarnissaat, apeqqutaa pattaanneqarpoq. Partiit tamarmik apeqqutaa akilluarpaat.