Pujuliortoqarneranik qalerrisaarisoqarnera minnermut pissutaavoq
Timmisartumi Dash-8-mi aquttup sisamanngornermi ullaakkut Paamiunut minnissaq aalajangiuppaa usit inaanni pujuliortoqarnera pissutigalugu. Timmisartoq Narsarsuarmit Nuummut ingerlaaraluarpoq
Annonse
Air Greenland timmisartua Dash-8 sisamanngornermi ullaakkut arfineq-pingasut missaanni Paamiunut mittariaqarsimavoq.
- Ilumoornerarsinnaavara timmisartumik aquttup aalajangiummagu Paamiunut minnissaq usit inaanni pujuliortoqarnera pissutigalugu. Qujanartumik pilertortumik susoqarnera paasineqarpoq timmisartorlu ajornartorsiutitaqanngitsumik missinnaalluni, Pia Christensen Bang, Air Greenlandimi attaveqaqatigiinnermik suliaqartoq Sermitsiaq.AG.-mut oqaluttuarpoq.
- Timmisartoq maannakkut Paamiuniippoq King Air atorlugu mekanikerimmik aallartitsissaagut nalilersuiartortussamik Dash-8 timmisartuusseqqissinnaanersoq.