Arctic Green Food akiliisinnaajunnaartutut nalunaarutigineqarpoq

Kalaallit Nunaanni Eqqartuussiviup ullumi nalunaarutigaa Arctic Green Food akiliisinnaajunnaartoq

Assi toqqorsivimmit: Sermitsiaq.AG

Ingerlatsivik Arctic Green Food akiliisinnaajunnaarpoq.

Kalaallit Nunaanni Eqqartuussiviup sisamanngornermi nal. 09.15 akiliisinnaajunnaarneq nalunaarutigaa, tamatuma kingorna eqqartuussissuserisoq Peter Schriver, Nuna Advokater, akiliisinnaajunnaartumik nakkutilliisussatut toqqarlugu.

Taamak nalunaaruteqarpoq eqqartuussisoq Kasper Skare, Kalaallit Nunaanni Eqqartuussivimmit.

Taassuma ilanngullugu nalunaarutigaa, nammineq qinnuteqarnermik tamanna aallaaveqartoq - isumaqarluni inuussutissanik tunisassiorfiup nammineq akiliisinnaajunnaarnermik qinnuteqaat nassiussimagaa.

Kasper Skare aamma erseqqissaatigaa ingerlatsiviup akiliisinnaajunnaarluni nalunaaruteqarnera sioqqullugu aningaasaliissuteqartarnera unitsinneqartoq. Tamannak ingerlasoqarsimaneranik tusagassiivitsigut eqqartuisoqaraluarpoq.

Aningaasaliissuteqarsinnaajunnaarsitsisarneq Kalaallit Nunaanni Eqqartuussivik aqqutigalugu ingerlanneqartarpoq siunertarineqartarluni ingerlatsiviit nakkutigineqarlutik anersaartorfeqalaarnissaat piffissallu taassuma iluani misissorneqartarluni akiitsoqarfigisanut akiligassatut tungaatigut aaqqissuussisoqarsinnaanersoq.

Suliani taamaattuni ingerlatsiviit nakkutigineqartarput akiitsoqarfigisaasa soqutigisaat salliunneqartarlutik.

Akiliisinnaajunnaarpoq
Arctic Green Foodip naatsorsuutaasa ersersippaat niuernerup iluanaarutaarujussuarsimanngisaannartoq.

Namminersorlutik oqartussat februaarip 21-anni tusagassiivinnut nalunaarutaanni erserpoq Arctic Green Foodip nammineerluni ilisimatitsissutigisimagaa ingerlatsivik akiliisinnaanngitsoq. Tamanna isumaqarpoq ingerlatsiviup aningaasatigut pisussaaffini naammassisinnaangikkai.

Arctic Green Foodip tassunga atatillugu aaqqiisutissaq kissaatigaa, ingerlatsiviullu siumoorutitut 2,1 millioner koruunit pissarsiariniarlugit qinnuteqarluni. Aningaasat taakkua namminersorluni oqartussanik kiffartuussinissamut isumaqatigiissutip 2013-imut atuuttup aningaasartassaasa affarai.

Inatsisartunut qinersinissaq pissutigalugu Naalakkersuisut qinnuteqaatinut taamaattunut aalajangiisinnaassuseqanngillat, politikerinit taamaallaat qulakkeerneqartussaavoq namminersorlutik oqartussat ingerlanneqarnerata qulakkeersimanissaa, nutaanik Naalakkersuisussanik toqqaasoqannginnera sioqqullugu.

Ajornartorsiutit allat
Arctic Green Food tusagassiivinnut nalunaarutikkut ilisimatitsissutigaa, ingerlatsivik siorna akit appariarujussuarnerannik eqqorneqarsimasoq tamatumalu saniatigut nunaqarfinnit tunisassiassat pitsaannginnerannit annaasaqarsimallutik.

Tamatuma saniatigut ingerlatsiviup qerititsivissua siorna januaarimi aserorpoq tamatuma nassataanik tunisassiorneq sivisuumik uninngalluni. Tamakkua tamarmik aningaasassaaleqinermut peqqutaaqataallutik.

Tamatuma saniatigut aningaaseriviit ilaasa ingerlatsivimmik tapersersuinini apparterujussuarsimavaa. Tamatuma nassataanik akileraartarnermik akisussaasut Arctic Green Foodip aningaaserivimmi kontui matussimavaat ingerlatsivik ataavartumik nakkutigisaralugu, taamaattumik sapaatip-akunnerata siulianit suliat tamagiit unitsinneqarsimapput, inuussutissanik tunisassiortoq ilisimatitsivoq.

Powered by Labrador CMS