K: Biologit pissaaneqarpallaarput

Ole Zeeb, Kattusseqatigiit Partiiat tunuliaqutaralugu Inatsisartunut qinigassanngortittoq, isumaqarpoq piniartut aalisartullu pisassat agguataarneqartarnerannut aalajangiinerni ilaatinneqarnerusariaqartut

Kattusseqatigiit Partiiannit Ole Zeeb, Inatsisartunut qinigassanngortittoq, aalisartut piniartullu atugarissaarnerulernissaat qineqqusaarutigaa. Assi.: Kattusseqatigiit Partiiat

- Piniartut aalisartullu pisassat agguataarneqaraangata tusaaniarneqanngippallaaqaat, tamanna allanngortinneqartariaqarpoq.

Matsip 12-anni Inatsisartunut qinersinissami, Kattusseqatigiit Partiiat tunuliaqutaralugu qinigassanngortittoq Ole Zeeb, oqarpoq.
Pisassanut agguataarinermi piniartut aalisartullu tusaaniarneqartalernissaat kissaatigaa.

- Biologit pisassat agguataarnissaat aalajangersortarpaat. Piniartut aalisartullu isumaqarput biologit nunatsinni pissaaneqarpallaartut. Uagut piniartuusugut aalisartuusugullu tusaaniarneqarnerusariaqarpugut, Ole Zeeb Sermitsiaq.AG-mut oqarpoq.

Kattusseqatigiit Partiiat tunuliaqutaralugu politikkeri nammineerluni piniartuuvoq, nunaqarfimmilu Ilulissat eqqaanniittumi Saqqami najugaqarluni.

-Kattusseqatigiit Partiiat Naalakkersuisooqataapput, biologillu tusaaneqarnerunissaat aalajangiiffigisarlugu. Qanoq taanna nassuiarsinnaaviuk?

- Aap parteerput Naalakkersuisooqataavoq, qangaliuna aalajangiiffigineqarsimasimasoq allanngortikkusukkiga. Biologit ukiut 30-t qaangerlugit tusaaniarneqarnissaannut inatsit atuuppoq, Naalakkersuisooqataanerput ukiut sisamat matuma siorna aallartippoq. Taamaattumik qineqqusaarninni aamma ersersinniarsimavara uunga inatsimmut sanasimasut kukkusimanerat nassuerutigeqqullugu, Ole Zeeb oqarpoq.

Nerukkaatissanut tapiissutit

Ole Zeebip aamma qineqqusaarutigaa qimmit qimuttut nerukkaatissaannik tapiissuteqartoqartalissasoq.

- Kujataani savaatillit nersutaataasa nerukkaatissaannut tapiisoqartarpoq. Avannaani qimuttunik qimmillit qimmitik nerukkaatissaannut tapiisoqarneq ajorluni. Taamatut assigiinngisitsineq allanngortikkusuppara, Ole Zeeb oqarpoq.

Ole Zeebip naqissuserpaa qimmit qimuttut Kalaallit Nunaannut iluaqutaasarmata.

- Piniartut qimmitik inuussutigaat, aammalu turistinut qimussiussinerni iluaqutaasarlutik. Taamaattumik assigiimmik pineqalernissarput angorusuppara, Ole Zeeb oqarpoq.

Powered by Labrador CMS