Qinigassanngortittoq: Qaleralittassat qaffanneqarlik
Nunaqarfimmi Ikerasammi piniartut aalisartullu sikukkut imaatigullu aalisarnermik inuussutissarsiornerat pitsaasumik ingerlavoq qaleraleqarluarmat
Qinersisoqalernerit tamarluinnaasa Avannaani qalerallit qineqqusaarutigineqartarput, aamma maannakkut qinersinissami taamaaqqippoq.
Qeqertarsuup Tunuani, Uummannami Upernavimmilu qaleralittassiisutit katillugit 4.500 tonsinik ilaneqarnissasut Karl-Kristian Kruse, Siumut sinnerlugu Inatsisartunut qinigassanngortitoq qineqqusaarummini allappoq.
- Aqutsiveqarfiit pingasut tamarmik immikkut 1.500 tonsinik qaffaaffigineqarnissaat imminut illersorsinnaalluartoq Karl-Kristian Kruse, Tamanut Avannaanimut oqarpoq.
Qalerallit mikinerulernerat aarlerinarsinnaavoq
Aqutsisoqarfinni pingasuni 1.500 tonsinik qaffaasoqaraluarpat pineqartuni qalerallit milliartornissaat aarlerinarsinnaavoq, taamaattumik qaffaanissaq ilalernartuunngitsoq, Helle Siegstad, Pinngortitaleriffimmi immikkoortoqarfimmi pisortaq allappoq.
Ukiunut marlunnut 2013-mi aamma 2014-mi Namminersornerusunit siunnersorneqarnissamik piumaffigineqarneq aallaavigalugu, Pinngortitaleriffimmit siunnersuutigineqarpoq, sinerissap qanittuani Qeqertarsuup Tunuani siornatulli 8.000 tonsinik pisassaqassasoq, sinerissap qanittuani 2011-mi tamakkiisumik 8.000 tonsit pisarineqarput
Susassaqarfik Uummannami 6.000 tonsit, 2011-mi 2012-milu 5000 tonsit siunnersuutigineqarput. 2011-mi 6.400 tonsit tamakkiisumik pisarineqarput.
Susassaqarfik Upernavik sinerissap qanittuani 6.300 tonsit, ukiuni siusinnerusuni siunnersuuteqartoqarsimanngitsoq, Pinngortitaleriffimmit oqaatigineqarpoq. 2011-mi tamakkiisumik 6.500 tonsit tamakkiisumik pisarineqarput.