Niviaq VM-imi iligiiaat ajugaaniutivinnerannut anngutinngitsoorpoq
VM-imi Italiami ingerlanneqartumi qallunaat kalaallit iligiiaani unammeqataasut semifinalimi kingullertut inissipput
Italiami Val di Fiemmemi sisoraatinik ujakkaarluni VM-imi iligiiaarluni unammineq arnani qallunaanut Niviaq Chemnitz Berthelsenip aamma Signe Schiølerip peqataaffigisaat iluatsitsiviuallaanngilaq.
Sisoraatinik ujakkaartartut tamarmik immikkut 1,2 kilometerit pingasoriarlugit ingerlasussaavaat. Iligiiaarluni unamminermi nunat 25-t peqataapput, taakkualu semifinalinut marlunnut agguarneqarsimapput. Iligiiaat pitsaanerpaat qulit ajugaaniutivinnermut annguttussaapput. Kalaallit qallunaallu iligiit semifinaliminni kingullertut inissipput.
Niviaq Chemnitz Berthelsen siulliulluni aallarpoq. Aqqutaani ingerlalluarpoq, nikinnermilu siullermi siullernut ilaalluni.
- Naammassisara naammagisimaarpara. Taamaattorli ippassaammagu ujakkaarsimanera timinni aamma malugisinnaavara, Niviaq Chemnitz Berthelsen Elite Sport Grønlandimeersumut Lauritz Heilmannimut qanimut malinnaasumut oqarpoq.
Martin Møller iligiiaarnermi angutinut qallunaanut peqataasussaagaluarpoq, peqataanissaraluanili taamaatiinnarlugu, VM-imi sukkaniunnernut tulliuttunut piareersimanerorusulluni.
Niviaq Chemnitz Berthelsen marlunngorpat VM-imi sukkaniuteqataaqqissaaq. Tamatumuuna fri stilimi 10 kilometerinut. Martin Møller pingasunngorpat fri stilimi 15 kilometerinut sukkaniuteqataassaaq, tassanilu Danmarkimi OL-imut peqataanissamut piumasaqaat ataassinnaassagini Martinip neriuutigaa.