Aana ukioq manna tusagassiortutsialak
Tusagassiuinermik suliaqartut peqatigiiffiat TP ukiumoortumik ataatsimeersuarnermini ukioq manna tusagassiortutsialammik kajumissaasiivoq. Kajumissaaserneqartoq tassaavoq Maren-Louise Poulsen
- ANU UNA UNA ANU illit aallarnikkat suliarujussuarlu naammassisat immikkut maluginiagassaannaanani sapiissusermik takutitsivoq, nersugassaavoq asseqanngilarlu. Arlaqarput atuagassianik assigiinngitsunik aallartitseriaraluartartut: nipilersornermut tunngasunik, timersortartunut, inuusuttunullu, tamarmilli aallartikkaluaannarlutik unittarput.
Taama Tusagassiuinermik suliaqartut Peqatigiiffiata TP-ip siulittaasua Mariia Simonsen, arfininngornermi unnukkut ataatsimeersuarnermi Tusagassiortutsialak 2013-mut oqaaseqarpoq. Kajumissaaserneqartoq tassaavoq ANU UNA UNA ANU-mik saqqummersitsisartoq aaqqissuisorlu Maren-Louise Poulsen.
- Inuusuttuuvoq, ilinniagartuunngorniartoq, tv-mi nutaarsiassanik atuaasartoq minnerunngitsumillu atuagassiamik eqqumiilaartumik ANU UNA UNA ANU-mik atilimmik aallarniisoq, saqqummersitsisartoq aaqqissuisorlu. 2011-mi atuagassiat aningaasatigut ajornartorsiuleruttorfiisa nalaani, iluatsitsinissaq qularnarseruttortoq, atuagassiaq inunnut inooriaatsimullu tunngasoq nutaaq aallartippat. ANU UNA UNA ANU uumasinnaassuseqarpoq, aningaasarsiornermigut patajaalliartorpoq nunatsinnilu tusagassiuutit silarsuaannut peertussaajunnaarluni ikkuppoq. Siunissami suliluarnissassinnik kissaallusi pilluaqquassi, Mariia Simonsen oqarpoq
Kajumissaat 5.000 koruuninik aningaasartaqarpoq.