- Nuna una uummatinniippoq

Nunatsinni innuttaasut 11 procentii taamallu qinersisinnaasut arlalipparujussuit Kalaallit Nunaata avataani inunngorsimasuupput. Taakkunannga amerlaqisut Kalaallit Nunaanni ilaqutaqalersimapput. Qitornaat, tamarmik kalaallisut oqallorissorsuanngorneq ajortut, ilaanni eqqumiilliortassapput, oqaatsit pillugit oqallinneq kingumut tusarsaaleraangat - taakkuami uummataanniippoq Kalaallit Nunaat kimilluunniit arsaarinnissutigineqarsinnaanngitsoq, soorlu Rina H. Lundip Facebookimini taamak erseqqitsigisumik oqaasertalersimagaa.

Rina H. Lund Danmarkimi idrætsefterskolernikuuvoq, Schweizimi AF-erluni, Kalaallit Nunaanni aamma Danmarkimi saaffiginnittarfinni sulinermik ilinniagaqarpoq, oqaatsit arlallit atorsinnaallugit aamma kalaallisut paasisarpoq ajunngilluinnartumik oqaaseqarluni, kisianni qallunaatut oqalullunilu allakkumaneruvoq. Tamakkua saniatigut Kujataani savaatilittut misilittagaqarpoq, meerai taqqavani inunngorlutik. Rina Nuummi inunngortoq kalaallimik anaanaqarpoq qallunaamik ataataqarluni. Issatsiaq Facebookimini allappoq:

- Nuna una uummatinniippoq. Maaniippoq angerlarsimaffiga – asasakka tamarmik maaniipput. Meeraaninni eqqaamasat nuannersut maaniipput, aqquserngit aqqutigisartakkat, atuarfigisarsimasat tamarmik inunnik naapissimasannik eqqqaassutissaqarput.

- Asannileqqaarneq maani misigaara – kunisseqqaarneq. Qaqqasunni, kuummi imeq nillarissup mamassusia. Aperlaami pisulluni qeraarpalunneq, inngilit erinarsornerattut nipeqartoq. Kaassassuk meeqqama oqaluttuannaarivaat, uaajeerlutik qalipannikuullutik angerlaraangamik – tassa nuanneq.

Pingaartorsiorluta ullorsiussagaangatta kalaallisuuvut atisarpavut – angajoqqaamma tuniunnikuusaat erligingaakkakka. Guuterput atorneqaraangat qamuuna misigissutsit sakkortuut qaffaassulertarput. Isumaqarpunga Kalaallit Nunaat alianaaqisoq assigiinngissitaartorpassuarnik innuttaqarluni siumukarluni ineriartornissaa upperaara. Ateqarpunga Rina kalaaliullungalu.