Kinamiut aatsitassarsiorfimmi aningaasaliiumanngitsut

V aamma DF annilaanngatigaat Kinamiut qaarusunni sulisartut Kalaallit Nunaaliarratissasut. Manna tikillugu Kinamiut suli tikinngillat

London Miningip pisortaanerata qallunaat aningaasaleerusuttut ISUAnik suliniummut peqataaqquai. Assi: Screendump, DR, Deadline

Kalaallit Nunaanni savimminissiorfissami Kinamiu ataasiinnarlunniit aningaasaliinissaminut soqutiginnillu nalunaaruteqanngilaq, naak sapaatit-akunneri kingulliit qallunaat naalakkersuisuisa illuatungiliuttuisalu oqaatsitigut assortuussutigigaluaraat.

Taama oqarpoq Graeme Hossie London Miningimi pisortaanerusoq aatsitassarsiorfimmik pilersaarutillit ingerlatsiviutaanni, taasuma tallimanngornermi unnukkut Deadline pulaarpaa, dr.dk allappoq.

Venstre aamma Dansk Folkeparti annilaanngatigaat Kalaallit Nunaanni Kinamit akissarsialullutik suliartortorpassuaqarnissaa, nunami aatsitassarsiornermik ingerlatsissallutik. Graeme Hossie naapertorlugu London Mining aningaasaliisartunik arlalippassuarnik isumaqatigiinniarsimagaluarpoq ilaatigut Kinamiunik.

Mannali tikillugu Kinamiut ingerlatsiviit, suliffeqarfiit aamma aningaaseriviit suliniummik tapersersuiniarlutik nalunaaruteqarsimanngillat.

Kisianni aatsitassarsiorfimmik pilersitsinissamut 2,5 millliarder dollarsit pisariaqartinneqartut suli pissarsiarineqaqqajanngillat, aatsitassarsiorfissaq Nuummit 175 kilometerinik ungasissusilimmi inissisimavoq, dr.dk allappoq.

Statsminister Helle Thorning-Schmidt (S) manna tikillugu akuliunniarsimanngilaq qulakkeerumagu Kinamiut ingerlatsiviutaasa nunatsinni aatsitassarsiornissami isumaqatigiissutit tamaasa pissarsiarinissaat akornuserniarlugit.

Deadline uani takusinnaavat - London Miningip pisortaanik oqaloqatiginninneq aallakaatitami 8.03 aallartippoq. Hans Jacob Helms aamma apersorneqartunut ilaavoq, taanna Siumut politikkikkut siunnersortaatut inissisimavoq.

Ministeriunerup oqaatigaa namminneq kalaallit suliniutinut angisuunut inatsisiliorneranni suleqatataasimanatik.

- Kalaallit suliassaqarfik taanna akisussaaffigaat, sammisaq pillugu ministeriuneq Helle Thorning-Schmidt oqartuarsinnarpoq.

Powered by Labrador CMS