Partiit suulluunniit suleqatigerusuppakka
Politikkikkut nuna inuilu tamaasa sulisissagaanni partiit suuneri apeqqutaatinnagit suleqatigiittoqarsinnaasariaqartoq, Qeqertarsuarmiik kommunalbestyrelsimut Inatsisartunullu qinigassanngortittoq isumaqarpoq
Ukiut 34-it atuarfeqarfimmi sulereerluni ukioq kingulleq soraarninngortoq, maannalu piniartutut inuussutissarsiuteqartoq, Qeqertarsuarmiu Kristian Broberg, misigisimavoq maanna inuiaqatigiinnik politikkikkut sullissinissamut piffissaq takkussimasoq, aammalu sullissiminissaminut piffisssaqarluarluni.
Qaasuitsup Kommunianut kommunalbestyrelsimut aamma Inatsisartunut qinersinissamut Siumut tunuliaqutigalugu qinigassanngortippoq. Taamaakkaluartoq isumaqarpoq inuiaqatigiit akornani politikkikkut sullissinermi periuseq eqarpallaalersimasoq, nutarterinissamullu piffissanngortoq. Naak nutarterinissamik eqqarsaataasup politikkikkut sulinermi imaaliallaannaq eqqunneqarsinnaanera qularutigigaluarlugu isumaqarpoq misilinneqartariaqartoq. Tassalu qinikkat inuiaqatigiit innuttaasalu pitsaanerpaamik sullinneqarsinnaanerat anguniarlugu sumi partiimi inissisimasuuneq aallaaviginngilluinnarlugu suleqatigiissinnaanerat qinigaaffimmi tullermi atorneqartariaqartoq isumaqarami.
Obama ilinniarfiuli
Akaareqatigiinnani qanilaassuseqanngitsumik suleqatigiinneq Kalaallit Nunaanni politikkikkut sulinermi kusananngitsumik pissusuerineqalersimasoq, Kristian Borberg isumaqarpoq.
- Qinikkatut sulilissagaluaruma kialuunniit oqarfigissanngilaanga kikkut suleqatigissanngikkikka. Inuit amerlanerpaartaat iluaqutigisinnaasaat pillugit sulisinnaaneq politikkikkut ilikkarneqartariaqarpoq. Aamma parteeqatikka taamaattartut nalunngilara, taakkulu aamma paasitinneqartariaqarput periuseq taanna akuerineqarsinnaanngitsoq.
- Amerlanerussueqarniaannarluni suleqatigiinniartarneq akuerineqarsinnaanngilaq. Inuit akerliunnaratik peqataanerulerpata aatsaat siunissaq pitsaanerusoq anguneqarsinnaavoq, imminnut nakkarsaqatigiinneq atorunnaarlugu.
Kristian Broberg isumaqarpoq inuiaqatigiit ikippallaarnertik pissutigalugu imminnut akerlilersorlutik sulinissaminnut nukissaqanngitsut - tamannalu ajornartorsiutit assigiinngitsorpassuit pilertarnerannut pissutaasutut nalilerpaa.
- Nuannaartorilluinnarpakka Amerikarmiut. Naalakkersuinikkut marluinnarnik parteeqarput, Demokraatit Republikanerillu. Præsident Barak Obama Demokratiusoq ima pitsaatigisumik iliorpoq, allaat illersornissamut ministerini Republikaneriusoq ivertippaa tamarmik suleqatigiillutik ikioqatigiittariaqaramik.
- Tassa imaappoq inuup piginnaasai aallaavigalugit nunap aqunneqarnera ilusilersorneqartariaqarpoq, imaanngitsoq partiimi suimiinnera apeqqutaassasoq. Tassalu uagut kalaallit tamanna maannut sanngiiffigivallaarparput.
Kalaallit Nunaanni politikkikut sulinermi inuiaat sorliit imaluunniit oqaatsit sorliit pingaarnertut inissinniarneqarnissaat isumaqatiginngilluinnarini ilanngullugu naqissuserpaa.
Qaasuitsup kommuniani susoqarnersoq sapaatip akunneranut saqqummertartumi Tamanut Avannaanimi oqaluttuap sinnera atuaruk. Aviisi akeqanngitsumik uani pisiariguk: