Kaali: Ataatsimik oqaasillit immikkoortinneqarnerat unitsilli
Ataasiinnarmik oqaasillit ilinniagaqarnissamut inuiaqatigiinnit qanoq pitsaanerusumik ikiorneqarsinnaanerannut IA-meersoq Kaali Olsen qineqqusaarnermini siunnersuutissaqarpoq
Inuusuttorpassuit allamiut oqaasiinik piginnaasakinnertik pissutigalugu ilinniarnissamut mattunneqartarnerat unitsinneqartariaqalerpoq.
Taama Inuit Ataqatigiinneersoq Kaali Olsen, Inatsisartunut qinigassanngortittoq, allappoq.
- Inuusuttorpassuit allamiut oqaasiinik piginnaasakinnertik pissutigalugu ilinniarnissamut mattunneqartarput. Inuusuttut ilarpassui oqaatsitigut ilikkagassatigullu naammaginartunik piginnaasaqalernissaminnut periarfissinneqarsimanngillat tapersersuinermik atuartinneqarnermillu naammaginartumik neqeroorfigineqartarimannginnamik – tassungalu atatillugu ilinniartitsisussaaleqineq annertuumik pisooqataavoq. Innuttaasut ataatsimik oqaasillit taamaattumik immikkoortinneqartarput – imaanngitsoq sanngiikkamik – kisianni ilinniartitaanikkut sumiginnagaasimagamik, Kaali Olsen allappoq.
- Inuusuttavut nunani allani inuusuttoqatiminnut naleqqiullutik pikkorlunnerunngivipput. Inuusuttavut pitsaasumik tapersersorneqarnermikkut ilinniartinneqarnermikkullu nunani allani ukioqatimissut angusarissaartigisinnaapput.
Sisimiuni amutsivimmi qanga saffiuut sanasullu pikkorilluinnartut ilinniartinneqartarsimanerat – malugalugu namminneq oqaatsitik atorlugit - Kaali Olsenip eqqaavaa.
- Sooq ullutsinni taamaaliorsinnaanngilagut? Soorunami sapinngilarput, politikeri Inuit Ataqatigiinneersoq allappoq, siunnersuutigaalu:
- Inatsisitigut qulakkeerneqassaaq inuutissarsiutitigut ilinniarfiit ilinniartut oqaatsitigut piginnaasaat tunngavigiinnarlugit itigartitsisassanngitsut. Ilinniakkap qaffasissusaa allanngortinneqassanngilaq ilinniarnerlu naallugu allamiut oqaasiinik pikkorissaasoqartuassaaq.
- Oqaatsinut ilinniarnertuunngorniarfimmik (misiliutaasumik) pilersitsisoqasaaq. Ataatsimik oqaasillit tiguneqartassapput pimoorullugulu oqaatsitigut ilinniartinneqartassapput. Ilinniarnerup qaffasissusaa soorunami ilinniarnertuunngorniarfittut allatulli qaffasissuseqassaaq.