Aleqa: Sara ilisimasaqarfiginngisaminut oqaaseqarpoq
- IA-meersoq Sara Olsvig ilisimasaqarfiginngisaminut tunngasunik oqaaseqarpoq, nunatta Danmarkillu akornanni nunanut allanut isumannaallisaanermullu tunngasuni immikkut isumaqatigiissutissamik suliamut Siumumeersoq Aleqa Hammond oqarpoq
Siumup siulittaasuata Aleqa Hammondip Inuit Ataqatigiillu sinnerlugit Folketingimut ilaasortap Sara Olsvigip akornanni pasilliutit ingerlaqqipput.
Taama pisoqarpoq Kalaallit Nunaanni aatsitassat aqunneqarnerat pillugu nunatta Danmarkillu akornanni nunanut allanut tunngasuni isumannaallisaanermilu immikkut suleqatigiinnissamik isumaqatigiissutissaq pillugu assortuunnermi.
Pingasunngornermi siusinnerusukkut Sara Olsvig nassuiaalluni ilaatigut oqarpoq, isumannaallisaaneq nunanullu allanut politikki pillugu Inatsisartunut qinersisoqareerpat Kalaallit Nunaata Danmarkillu isumaqatigiissutissaat ministeriunerup Helle Thorning-Schmidtip nunanullu allanut ministerip Villy Søvndalip arlaleriarlutik oqaatigisarsimagaat.
Taama pisoqarpoq Siumup siulitaasua pasilliuteqareersorlu oqarluni 'Sara Olsvig uagut allat nalusatsinnik ilisimasaqarsimassaaq. Imaluunniit ilisimasaqarfiginngisani pillugit oqaaseqarsimassaaq’.
Aleqa Hammondillu pasipiluinini allanngortissimanngilaa.
Læs "Sara: Derfor kender jeg til særskilt samarbejdsaftale"
Læs "Tvist om hemmelig råstofaftale fortsætter"
Apeqqutit akissutissaqanngitsorpassuit
- Sara Olsvig sammisat nalinginnaasut kikkunnilluunniit ilisimaneqareersut pillugit oqaaseqarpoq, taakkulu ministeriunerup qanoq oqarsimaneranut namminersornerlu pillugu isumaqatigiissutip qanoq kinguneqartussaaneranut tunngasut. Saaqqap oqaasii ataatsimiititaliamut ilaasortanit tamanit ilisimaneqareerput, kisianni isumaqatigiissutip qanoq nassataqarnissaa pillugu oqaaseqanngilluinnarpoq. Tassa ilisimasaqarfiginngisani pillugu oqaaseqarpoq - tassalu Naalakkersuisut siulittaasuata Kuupik Kleistip aamma nunanut allanut ministerip Villy Søvndalip akornanni isumaqatigiissummut tunngasunik, Aleqa Hammond Sermitsiaq.AG-mut oqarpoq.
- Sooq Kuupik Kleist oqarpa isumaqatigiissut naalakkersuisunngortussanit atsiorneqassasoq? Sooq isumaqatigiissutaasimasoq tamanut saqqummiukkumanngilaa? Sooq Folketingimi isumasioqatigiittoqarnerani nunanut allanut ministeri aqqutigalugu tamanna tusassavarput? Aatsitassaatigut oqartussaanerput piginnaatitaanivullu naammannginnamik imaluunniit sunaana tunngavigalugu Kuupk Kleist aatsitassat suut pingaaruteqarnerannik pingaaruteqannginneranilluunniit Danmarkimut nassuiaateqaqqittariaqalersoq? Siumup siulittaasua aperaaq, naalakkersuisullu siulittaasuatut 'innuttaasunut saqqumisumik pissuseqarnissaa' aamma ujartorlugu.
Læs "Siumut: Hemmelig råstofaftale skal frem"
Læs "Sara: En stærk misfortolkning, Aleqa"