Aleqa naalagaaffeqatigiinnermit avissaarusuppoq
Siumup siulittaasua Aleqa Hammond nammineerluni aalajangiisinnaasuuguni nunarput naalagaaffeqatigiinnermit avissaarluinnassagaluarpoq
(Allasserisaq nutartigaavoq)
Siumup siulittaasuata Aleqa Hammondip pingasunngornermi unnukkut Danmarkimi nalunaaqutaq malillugu nal. 21.30 DR-ip tv-aviisianut nunatta naalagaaffeqatigiinnermit avissaartariaqarneranik oqaasii Danmarkimi politikerinit uissuummissutigineqarput.
- Siumut namminiilivinnissamik kissaateqarpoq. Ataatsimoortumik tapiissuteqartarnermik aaqqissuussineq qimakkusupparput. Nunarput oqartussaaffinnut tamanut akisussaalerusuppoq. Nunatta siunissami naalagaaffeqatigiinnerup avataani nunatut namminiilivinnissani sulissutiginiarpaa, Siumup siulittaasua DR-imi nutaarsiassanut oqarpoq.
Oqaaseqaat uissuumminarluinnartoq politikerit arlallit paasiuminaatsippaat.
- Tupattorujussuuvunga. Isumaqarpunga Aleqa Hammond politikeritut piviusorsiortorujussuusaraluartoq. Saqqummiussai takorluuinerupput kingulermik 1960-ikkut naalerneranni tusarneqartut, isumaqaraluarpungalu qaangiussimasut, Dansk Folkepartimi Kalaallit Nunaannut tunngasuni oqaaseqartartoq Søren Espersen oqarpoq.
K: Naalagaaffeqatigiinneq nutarterneqassaaq
Kalaallit Nunaata naalagaaffeqatigiinnermit avissaarnissaa De Konservativenit mianersoqqussutigineqarpoq. Partiip nunanut allanut ministererisimasaa Per Stig Møller naapertorlugu nunat pissaanilissuit USA, Kina Ruslandinilu issittumi ima annertutigisumik soqutigisaqarput, Kalaallit Nunaat Danmark peqatigalugu FN-imi NATO-milu ajunnginnerusumik illersorneqarsinnaalluni.
Per Stig Møllerili isumaqarpoq, oqallinneq Kalaallit Nunaata namminiilivinneranik kinguneqarsinnaasoq.
- Tamanna ilimanaatilerujussuuvoq. Naalagaaffeqatigiinneq Kalaallit Nunaata naammagisimaagaanik nutartinngikkutsigu taava tamanna naalagaaffeqatigiinnerup atorunnaassutigissavaa, Per Stig Møller DR-imi nutaarsiassanut oqarpoq.
Aleqa Hammondip oqaasiinut atatillugu ministeriuneq Helle Thorning-Schmidt, Socialdemokraterne, imaluunniit nunanut allanut ministeri Villy Søvndal, SF, DR-imut oqaaseqarusunngillat.
Inatsisit tunngaviusut naapertorlugit Kalaallit Nunaat Danmarkip oqartussaanerata ataaniippoq, kisiannili 2009-mi namminersornerup eqqunneqarneratigut suliassaqarfinnik arlalinnik isumaginnilersimalluni.