TV-iikkut qineqqusaartoqarnissaa sioqqullugu: nuna tamakkerlugu politikki annermik

TV-iikkut qineqqusaartitsinerit siulliit marluk pingaarnertigut naatsorsuutigisatut ingerlasimapput.

Taama politikkikkut naliliisartoq Sten Lund isumaqarpoq, taannalu Sermitsiaq.AG-mit qinnuigineqarpoq taakkuninnga nalileeqqullugu unnugulu tv-iikkut qinequsaartitsinerit pingajussaat Qaqortumi timersortarfimmit ingerlanneqartussaq sioqqullugu siumut isigisumik nalileeqqullugu.

- TV-iikkut qineqqusaartitsinerit siulliit marluk pineranni oqallinneq maannamut qanoq isumaqarfigaajuk?

- Maannamut oqallinneq najukkami politikkikkut oqaaseqaatinik qinersisartut isummersorfigisinnaasaannik imaqarsimavoq, assersuutigalugu Ilulissani qineqqusaartoqarnerani qaleralittassiissutit, naak nuna tamakkerlugu politikkimut tunngasut isiginiarneqarnerusussaagaluartut soorlu aalisartunik, nunatsinni nioqqutissatut avammullu nioqqutissatut tunisaqaqqinnginnermi tunisassiassanik namminneq assatik atorlugit piareersaasinnaasunik, piginnaanngorsaaqqiineq. Oqaaseqartut arlaqanngitsut eqqaassanngikkaanni soorluuna kommunerujussuup sinnera Ilulissani najuuttut taasinerannik qinigassanngortittut pissarsiniunneranni puigorneqartoq.

- Sisimiuni qinigassanngortittut qinersisartullu ilaannit illuliortiternermi sanaartornermilu aningaasaliissutit Nuummiit siammartinneqarnerunissaat isiginiarneqarneruvoq. Qinigassanngortittut ilaatigut sulianit inunnut ataasiakkaanut tunngasunit suliamik ingerlatsinermut qaninngoorsinnaasunik kommunimilu politikkikkut sammisanik kommunit aqutsinerat pillugu inatsit naapertorlugu kommuninit isumagineqartussanit pisarisoorneqartarput.

- Qineqqusaarneq suliniutinik assigiinngitsunik pingaartumik ilinniartitaanerup isumaginninnermullu tunnganerusut soorlu meeqqanik paaqqinninnerup iluanni aallartitsisoqartariaqalerneranik aamma imaqarpoq.

Oqarluartaanerit kingunipiloqarsinnaasut
- Sammisaqarpa naatsorsuutigisimasannik?

- Qineqqusaarnerit qineqqusaartarnernut tamanut assingupput, taakkunanimi qinigassanngortittut anguniakkatik aqqutigalugit qinersisartunik tiguaaniartarput. Sammisat najukkami innuttaasunut ilaatigullu inunnut ataasiakkaanut kalluaasuupput. Qinigassanngortittut amerlanerpaartaannit qinersisartut misigissusaat eqqarsarsinnaanerannut taarsiullugu sunnerniarneqarput, tamannalu naggataatigut qinigassanngortittunut akisusinnaavoq, qineqqusaarnerup nalaani neriorsuutigisimasaminnik naliliivigineqartussanngorsinnaagamik.

- TV-iikkut qineqqusaartitsinerni sinneruttuni marlunni sammisassat suut ilimagaagit?

- Qinigassanngortittut unammillerneqarnerunissaat qilanaaraara, assersuutigalugu qinnuigineqarlutik aningaasat suminngaanneernissaannik saqqummiussinissamik. Uanga isinnit isigalugu qinigassanngortittut oqaatigisaannik nassuiaatitsisarnissaq aqutsisut isumagisussaavaat, ilaatigut aningaasanut inatsit eqqarsaatigalugu, qinigassanngortittut assigiingitsunik neriorsuuteqaraangata kontot assigiinngitsut iluanni pissutsit ilanngunneqartarlutik.

Qineqqusaarneq qangatoortoq
- Partiit politikerillu sorliit ajunngitsumik ajortumilluunniit immikkoortippat?

- Partiit akornanni qangatut qineqqusaartoqarpoq, partiit naalakkersuisuutitaqartut suliniutigisimasaannik suliniuteqarsimannginnerannilluunniit partiinit illuatungiliuttunit pissusissamisoortumik pisuutinniarneqartarlutik. Tamatumanilu partiit naalakkersuisuutitaqartut politikkiminnik soorunami illersuiniartarsimapput. Oqaatsit pillugit oqallinnerup tamaginni misigissutsinik attuinera qularutissaanngilaq, taamaattumillu immaqa pisariaqartuminngaanniit initunerusimalluni.

- TV-iikkut qineqqussaarnerit taasinernik nikisitsisimanissaat ilimagaajuk?

- TV-iikkut qineqqusaarnerit taasinernik nikisitsisisarnerat ilimagaara, isumaqarama TV-imi maluginiagaqaqqaarneq qinersisartunut pingaarutilerujussuusoq, pingaartumik inuusunnerusunut politikkikkut inissisimaffissaminnik suli nassaavissimanngitsunut, Sten Lund oqarpoq.