Nunaoil 2012-mi annertuumik amigartoorpoq

12 million koruunit.

Nunaoil A/S-ip 2012-mi amigartoorutaa taama annertutigaaq.

Pitsaanngitsumik angusaqarnermut ilaatigut peqqutaavoq 2012-mi annikitsuinnarmik seismik atorlugu misissuisoqarsimanera, Nunaoilimi pisortaaneq Hans Kristian Olsen nalunaarpoq.

Ukiuni kingullerni Kalaallit Nunaata imartaata uuliaqarsinnaanera uuliasiortitseqatigiiffinnit nunatta avataaneersunit aaatsaat taamak annertutigisumik soqutigineqalersimavoq. Ukiup 2012-p naanerani uuliasiornermut akuersissutit katillugit 20-upput akuersissuteqarfinnilu taakkunani imartaq ataatsimut katillugu 202.032 kvadratkilometerinik annertussusilik uuliasiorfigineqarpoq.

Akuersissutit amerlanerunissaat naatsorsuutgigaa
Nunaoilip naatsorsuutigaa ukiut arlalinnguit ingerlaneranni uuliasiornermut akuersissutit suli amerlanerulerumaartut, tassa Namminersorlutik Oqartussat Tunup Avannaarsuata imartaani, Grønlandshavemi, 2013-mi 2014-milu neqerooruteqatitsinerit nutaat malitsigisaannik akuersissutissiisoqartussaammat.

Nunaoil akuersissutini 20-ni tamani ujarlernerup nalaani akiagaalluni (akileeqataanani) 8-12,5 procentimik nalilimmik peqataavoq.

2012-mi uuliasiorluni qillerisoqanngikkaluartoq Baffinip Kangerliumarngani, Kitaata avannaarpiaani annertuumik misissuisoqarsimavoq. Misissuinerit ingerlanneqartut tassaapput 2D seismik kiisalu aatsaat Kalaallit Nunaanni Issittumilu avannarlermi aatsaat taama annertutigisumik 3D seismik atorlugu misissuisoqarsimalluni, Hans Kristian Olsen oqarpoq.

Nunaoil 2013-imi 10,1 million koruuninik amigaattoornissaa ilimagineqarpoq