Qinigassanngortittoq: Nakorsiartut qitiutinneqarlik

Siumut sinnerlugu Inatsisartunut qinigassanngortittoq, Lise Svenningsen, qineqqusaarutigaa Kalaallit Nunaanni Danmarkillu peqqinnissaqarfiini suleqatigiinnerusariaqartut

Lise Svenningsen, Siumut tunuliaqutaralugu Inatsisartunut qinigassanngortittup qineqqusaarutigaa Kalaallit Nunaannit Danmarkimilu peqqinnissaqarfiit suleqatigiilluarnerusariaqartut. Assi.: Leiff Josefsen

Peqqinnissaqarfimmi sulinermi aaqqitassaqarpoq, naak Kalaallit Nunaanni Danmarkimilu sulisut suleqatigiilluaraluartut.
Siumut sinnerlugu Inatsisartunut qinigassanngortittoq, Lise Svenningsen isumaqarpoq.

- Napparsimasoq qiteritillugu inuppalaartumik sullissinikkut tamanna anguniarneqarsinnaasoq isumaqarpunga.

- Paasisariaqarparput nappaatit tamarmik katsorsarneqarsinnaanngimmata nappaateqartullu ilaat nunatsinniit aallartariaqartarmata, soorlu Danmarkimut – amerlanertigullu Rigshospitalimut. Avatangiisit nerisassallu sungiusimasat qimallugit kisimiillutik ilaquttaminnik ingerlaqateqaratik aallartariaqartarlutik. Qallunaatullu oqalussinnaanngikkaangamik isumakkiigaaginnartutut misigitinneqartarlutik.

- Aatsaat immikkorluinnnaq pisimasoqartillugu ilaquttat qaninnerpaat ingerlaqatigitinneqartarput. Taamaammat isumaqarpunga napparsimmaviit tamarmik oqalutsinik piareersimasartunik atorfinitsitsisariaqartut. Taamaaliornikkut pitsaasumik attaveqatigiinneq ataqqeqatigiinnertalik napparsimasup peqqinnissamillu sulisuusut akornanni pisassammat, Lise Svenningsen oqarpoq, taallugulu kikkut tamarmik akeqanngitsumik angalasinnaanngitsut.

Inunnik isumaginnittut amerlanerusut

Siumut tunuliaqutaralugu politikkeri isumaqarpoq, inunnik isumaginninnermut sulialinnik amerlanerusunik atorfinitsitisoqartariaqartoq. Isumaginnittut napparsimasut kisimik Danmarkimiinnerminni sullittassagaat siunersuutigalugu.
Inunnik isumaginnittut napparsimasut pulaartassagaat, ikiorlugit siunnersorlugillu siunersuutigalugu. Napparsimasut ilaqutaannut, Kalaallit Nunaannilu pisortat suliffeqarfiinut attaveqaataasassallutik siunersuutigalugu. Inunnik isumaginnittut nalunngeqqissaartariaqarpaat napparsimasut suna pisariaqartinneraat, ajunnginnerpaamik atugaqarnissaat anguniarlugu.

- Qulakkeerusuppara suleqatigiinneq, attaveqatigiinneq paasititsiniaanerlu nunatsinni peqqinnissaqarfiup Danmarkimilu Peqqinninnissamut ministeeriaqarfiata akornanni pilersinneqassasoq. Taamaalippat ilaqutaasut Danmarkimut ingerlaqataasimasut pinngitsoornatik attavigineqartassammata. Imaluunniit napparsimasoq uninngaffimminiit allamut nooriataassagaluarpat, napparsimasorluunniit suliariteriataassagaluarpat inunnik sullissisup attaveqartarnissaa pisariaqassalluni, Lise Svenningsen nassuiaavoq.

Ikiuinerunissaq

- Tamakkua saniatigut isumaqarpunga kulturerput pillugu oqaatsitta saniatigut assigiinngissutaasut allat aamma paasititsiniutigisariaqartut paatsooqatigiittarnerit amerlasuut pinngitsoortinniarlugit taamaaliornerit tamarmik napparsimasumut oqilisaasissapput. Napparsimasut peqatigiiffii nukittorsartariaqarput tusaaniarneqartarnissaallu qulakkeerneqartariaqarpoq.

Lise Svenningsenip neriuutigaa ikiuisarnerit nakorsiartut najugaqarfiannit ajunnginnerulissasut. Toqusoortoqaraangat Danmarkimi qanoq iliortoqartarnersoq Kalaallit Nunaanniit allaanerunera pissutaalluni ikiuisarnerit pitsaanerussasut siunersuutigalugu.

Powered by Labrador CMS