Palle: Meeqqat tamarmik assigiimmik periarfissaqassapput

- Demokraatini pilersikkumavagut inuiaqatigiit assigiimmik periarfissallit kisianni ima uppiatiginngilagut isumaqarluta kikkut tamarmik assigiillutik inunngortartut.

Demokraatit sinnerlugit Inatsisartunut qinigassanngorteqqittoq Palle Christiansen oqarpoq.

- Tamatta inunngornikuuvugut assigiinngitsunik periarfissaqarluta aamma assigiinngitsunik piginnaaneqarluta. Demokraatini pingaartipparput tamatta paasisssagipput sunik piginnaaneqarnerluta aamma qanoq iliorutta atorluarsinnaanerunerlutigit. Iluaqutaanngilaq isumaqarutta Messitut tamatta arsallaqqitsigilersinnaalluta sungiusarnerput ilungersuukkutsigu. Iluaqutaanngilaq isumaqarutta ujarassiuunngorsinnaalluta Minik Rosingitut pikkoritsigisut, Palle Christiansen oqarpoq.

Palle Christiansen nassuiaavoq, Demokraatit suliniutiginiaraat ilinniartitaaneq assigiinngitsunik periarfissaqassasoq, taamaattumik nalinginnaanngitsumik piginnaanillit aamma periarfissaqarluartariaqartut.

Ilinniartitsisut perorsaasullu ilinniarsimasut
- Pilersikkusupparput ilinniartitaaneq immikkut piginnaanernik ersarinnerulersitsisoq. Taamaassappat pisariaqarput ilinniartitsisut perorsaasullu pikkorissut ilinniarluarsimasullu taamaattoqassappallu pisariaqarpoq sulisut sulinerminni pitsaasunik sinaakkuteqarnissaat. Ullumikkut ajoraluartumik sumiiffiit ilaanni meeqqeriviit amingaataapput, meeqqat atuarfii nungullarnikuupput aamma meeqqerivinni meeqqallu atuarfiini sulisut amerlavallaat ilinniartitsilluarnissaminnut naapertuuttumik ilinniagaqarnikuunngillat. Tamanna uggornarluinnarpoq allanngortittariaqarlunilu, Palle Christiansen oqarpoq.

-Taamaattumik meeqqeriviit meeqqallu atuarfiisa iluinni silataannilu sinaakkutit nutarternissaat pingaartittariaqarparput. Iluarsaassineq nutaanilluunniit sanaartorneq aqqutigalugit tamanna pisinnaavoq. Tamatuma saniatigut ilinniartitsisut perorsaasullu amerlanerusut ilinniartittariaqarpagut immikkoortuni taakkunani sulisussaaleqisarneq kipitinniarlugu. Aamma ilinniartitsisunngorniartarneq pitsanngorsartariaqarparput ilinniartitsisut fagini amerlanerusuni ilinniartitsisinnaalersillugit, perorsaaneq sukumiisoq atorsinnaalersillugu minnerunngitsumillu ungasinganiit ilinniartitseriaatsimik atuisinnaalersillugit, Palle Christiansen oqarpoq.