Oqaatsit peqqutigalugit mattussaasoqassanngilaq

- Danmarkimit nunatsiniillu atsioqatigiissutigineqarpoq kinaluunniit oqaatsit peqqutigalugit tamat naalakkersueqataanerannit mattunneqassanngitsoq. Johan Lund Olsen IA-meersoq avissaartuuttoqannginnissaanik oqaaqqissaarivoq

Nunatsinni inuiaqatigiinnik avissaartuutsiniartoqassanngilaq tunngaviusumillu pisinnaatitaaffiiagaalluni soorlu nunatisnni partiit ilaasa tamanna kissaatigigaat, Johan Lund Olsen isumaqarpoq.

- Namminersorneq pillugu Isumalioqatigiissitaasimasut marluk ilaasortaaffigereerlugit manna pingaartillugu eqqaamaqqussavara, tassalu Namminersornerup eqqunneqarneratigut siunertaanngisaannarmat innuttaaqativut nunaqqativullu danskinit kalaallinillu kingoqqisut, oqaatsit atorneqartut patsigiinnarlugit inuiaqatigiit inatsisit naapertorlugit aqunneqarnerannit oqartussaaqataanermillu mattunneqassasut

Taama allappoq IA sinnerlugu qinigassanngortittoq Johan Lund Olsen.

- Isumalioqatigiissitaasimasut taamatut isummernerannut soorunami tunngaviulluinnarpoq innuttaaqatitta sisamararterutaasa missaat naalakkersuinikkut oqartussaaqataanermit isummersorsinnaanermillu mattunneqassasut kissaatigineqanngisaannarsimammat. Tamattami aamma Partii Inuit ilanngullutik eqqaamajuagassaraarput, qinerseqataasinnaaneq aammalu qinigaasinnaaneq pisinnaatitaaffiummata avissaartinneqarsinnaanngitsut. Qinerseqataasinnaalereeruit aamma qinigaasinnaavutit killormullu.

Nangilluni allappoq Inatsisartut oqaluttarfiannit kalaallisuinnaq oqaluttoqalernissaanik piumasaqalernissaq ingasappallaartoq.

- Piviusormi tassaavoq kalaaleqateqaratta qallunaatuinnaq oqaluttuugaluarlutik uatsitulli kalaallinik siuaasaqarlutillu attaveqartut. Innuttaqativut nunaqqativullu taakku aamma Namminersornermi oqartussaaqataasariaqarput ilusilersueqataallutillu. Namminersorneq pillugu inatsit, Inatsit Tunngaviusoq (Grundloven) innimigalugu ataqqillugulu isumaqatigiissutigineqarpoq. Taamatuttaaq Namminersorneq pillugu inatsit Naalagaffiit Peqatigiit (FN-ip) inuit pisinnaatitaaffii pillugit aalajangersagaliai ataqqillugit iluseqassasoq aamma suliaavoq.

Powered by Labrador CMS