Nunatsinni Frelsens Hæri

Kalaallit Nunaanni Frelsens Hærip immikkoortortaa siulleq sapaatip-akunnerata naanerani ammarneqarpoq

Frelsens Hær Kalaallit Nunaanni immikkoortortaq maanna pilersiippaat. Assi: Frelsens Hær i Danmark.

Ukiup affaani piareersareerlui Frelsens Hærip sapaatip-akunnerata siuliani Kalaallit Nunaanni immikkoortortami siullersaa Nuummii illoqarfiup qeqqani inini iseruminartuni ammarpai. Aappariit Petura aamma Magnus Haraldsen, aggustimili Frelsens Hærip isaanissaat sulissutigisimavaat, Frelsens Hær Danmarkimit tusagassiivinnut allapput.

Tusarnaarusupput ilinniarlutillu

Danmarkimit, Norge aamma Tuluit Nunaannit Frelsens Hærimi pisortaanerit ammaanermi peqataapput. Frelsens Hærip erfalasuanik pisortatigoortumik ileqqussaasumillu tunniussineq, nunat tamalaat akornanni Europa sinnerlugu allattumit kommandører Robert Street-ip ingerlappaa, Frelsens Hæri nalunaaruteqarpoq.

- Frelsens Hæri Kalaallit Nunaannut tikinngilaq Guutimik ajoqersuussiartorluni, Guuti nunarsuup pinngoqqaarneraniilli tamaaniimmat. Frelsens Hæri kristumiussusermik Kalaallit Nunaannut eqqussiartorluni takkutinngilaq, taanna ukiuni hornorujulikkuutaani tamaanniimmat oqaluffinnit arlalinnit ajoqersuussutigineqareerluni. Kisianni takkuppugut suliamut peqataajumalluta ikiuuffigisinnaasatsinni, Robert Street oqarpoq.

Tikilluaqquneqarneq

Kommuneqarfik Sermersuumi Tungiuinermut ataatsimiititaliami siulittaasoq Karen M. Lynge, D, ikiuiniaqatigiit tikilluaqquai, taakkua Danmarkimi sumiiffinni assigiinngitsuni kialaarfiusinnaasunik iserfissaqartitsinermikkut ilisimaneqarput.

- Islandimi paasisassarsiorlunga angalaqqammerpunga tamaani Frelsens Hærip suliai takullugit. Sinngagilaarlugit. Taamaattumik nuannaarutigaara taamannak suliaqartunik Nuummi aallartitsisoqarmat, Karen M. Lynge sapaatip-akunnerata siuliani ammaanersiortoqarmat oqarpoq.

Sapaataip-akunnerisa naanerini unnuakkut naalagiarneq periarfissaassaaq aamma Kalaallit Nunaanni Frelsens Hærip "Illu ammasoq" pilersissallugu sulissutigaat, tassani ataatsimooqatigiinneq nerisassallu akikitsut neqeroorutigiumallugit, Frelsens Hæri ilisimatitsivoq.

Powered by Labrador CMS